काठमाडौ : सरकार र डा.गोविन्द केसी बीच बिहीबार राति भएको सहमतिका बुँदा चाँडो कार्यान्वयन गर्न प्रतिपक्षी कांग्रेसले माग गरेको छ । सरकारसँगको सहमतिपछि डा.केसीले बिहीबार राति २७ दिने अनशन तोडेका थिए ।
डा.केसीको मागमा ऐक्यवद्धता जनाउँदै आन्दोलन गरेको कांग्रेसले पूर्वघोषित १५ साउनको विरोध प्रदर्शन भने यथावत रहने जनाएको छ । सबै जिल्ला सदरमुकाममा विरोध प्रदर्शन गर्ने पूर्वघोषित कार्यक्रम यथावत रहेको कांग्रेसले जनाएको छ । संविधानको धारा ९१ को उपधारा २ को कार्यान्वयन, निषेधाज्ञा, चर्को मूल्यवृद्धि, उपकुलमाथि अपमानजनक व्यवहारलगायतका मुद्दामा कांग्रेसले विरोध गर्न लागेको हो ।
पार्टी मुख्यालयमा सानेपामा शुक्रबार पत्रकार सम्मेलन गरी सरकार–केसीबीचको सहमति बारेमा आफ्नो ७ बँुदे धारणा सार्वजनिक गर्दै कांग्रेस प्रवक्ता विश्वप्रकाश शर्माले कांग्रेसकै दबाबका कारण केसीको माग सम्बोधन गर्न सरकार तयार भएको दाबी गरे ।
कांग्रेस नेतृत्वको अघिल्लो सरकारले जारी गरेको अध्यादेशको मर्म विपरित वर्तमान सरकारले विधेयक ल्याइएकाले सडक आन्दोलनमा उत्रिन परेको कांग्रेसको भनाइ छ । त्यही विधेयकको विरोधमा डा.केसी अनशनमा थिए ।
चिकित्सा शिक्षा सुधारका पक्षमा कांग्रेसले सुधारका कदम थालनी गरेको दाबी गर्दै कांग्रेसले आफ्ना कदम सहि प्रमाणित भएको जनाएको छ । कांग्रेसले विगतमा आफ्नै पालामा समेत केही कमजोरी भएपनि कांग्रेस नेृत्वको सरकारले सुधार कदम थालनी भएको दाबी गरेको छ ।
कांग्रेसले शुक्रबार सार्वजनिक गरेको ७ बुँदे धारणामा भनेको छ, ‘हाम्रै नेता सुशील कोइराला नेतृत्वको सरकारका पालमा माथेमा आयोग बन्यो । माथेमा आयोगको प्रतिवेदनलाई सम्बोधन हुने गरी शेरबहादुर देउवा नेतृत्वको सरकारका पालामा शिक्षा अध्यादेश आयो ।’
कांग्रेसले बिहीबारको सहमतिलाई स्वागत गर्दै त्यसको इमान्दार कार्यान्वयन हुनुपर्नेमा जोड दिएको छ । ‘डाक्टर केसीको लामो अनशन, संसद्मा कांग्रेसको सशक्त प्रस्तुति, सडकमा हजारौंको प्रदर्शन पश्चात अन्ततः जनभावनाको कदर गर्न सरकार वाध्य भयो’, कांग्रेसले जारी गरेको वक्तव्यमा भनिएको छ, ‘बहुमत र विवेकको जब द्वन्द्व हुन्छ तब विवेकले जित्छ र जित्नुपर्छ भन्ने ऐतिहासिक पाठ यो प्रकरणबाट सरकारले आत्मसात गर्नेछ भन्ने आशा लिएका छौं ।’
प्रतिक्रिया दिनुहोस !
