काँकडभिट्टा : पूर्वीनाका काँकडभिट्टामा ‘एक्सरे मेसिन’ सहित एकीकृत चेक प्रणाली सञ्चालनमा आएको छ । मेची भन्सार कार्यालयले चोरी–तस्करी र अवैध ओसारपसार नियन्त्रण गर्न अत्याधुनिक मेसिनसहित भन्सार चेक प्रणाली सुरु भएको हो ।
मेसिन जडान भएसँगै नेपाल–भारत सीमावर्ती नाकामा हुन सक्ने अवैध ओसारपसार नियन्त्रणमा आएको मेची भन्सार कार्यालय काँकडभिट्टाका प्रमुख टेकबहादुर अर्यालले दाबी गरेका छन् । अर्यालका अनुसार प्रवेशद्वारमा यात्रुलाई सहज तरिकाबाट चेक गर्न र शंकास्पद सामानलाई नियन्त्रणमा लिन मेसिन भन्सार नाकाका लागि उपयुक्त छ ।
भन्सार छली, अवैध सामानको पैठारीलगायत सुरक्षा दृष्टिले यो प्रणाली प्रभावकारी भएको उनले बताए । यो मेसिनको प्रयोगसँगै प्रवेशद्वारमा निर्माण भएको यात्रुशाखा भवनमा मेसिनमा स्क्यान गरेको सामान सशस्त्र प्रहरी, नेपाल प्रहरी र भन्सार कर्मचारीले संयुक्त रूपमा चेक गर्नेछन् ।
एक्सरे मेसिन सञ्चालनमा ल्याइएसँगै मेची भन्सार कार्यालयको भन्सार जाँच टोली, नेपाल प्रहरी र सशस्त्र प्रहरी बल राजस्व तथा भन्सार सुरक्षा गुल्म काँकडभिट्टाको संयुक्त टोलीले एकै ठाउँबाट चेक गर्न थालेका छन् ।
भारत बंगलादेश, भुटानलगायत तेस्रो मुलुकसँग सम्बन्ध जोडिएकाले यो नाका अति संवेदनशील भएकाले पनि प्रविधि प्रयोगबाट चेक सुरु गरिएको भन्सार कार्यालयले जनाएको छ । नाकामा जडान भएको ‘एक्सरे मेसिन’ ले अवैध हातहतियार बरामद र व्यक्ति पहिचानमा समेत सजिलो हुने प्रहरीको भनाइ छ ।
कानुनले प्रतिबन्ध गरेका वस्तु लागुऔषध, विस्फोटक पदार्थ, हातहतियार, मादकपदार्थलगायत वस्तु यो मेसिनको प्रयोगसँगै पत्ता लगाउन छिटो र सजिलो हुने इलाका प्रहरी कार्यालय बिर्तामोडका प्रमुख डीएसपि कृष्ण कोइरालाले बताए । भन्सार विभागबाट दुई वर्षअघि नै मेची भन्सारमा पठाएको यो मेसिन आवश्यक कर्मचारी तथा सीमा क्षेत्रमा राख्ने स्थान अभावले सदुपयोग हुन सकेको थिएन ।
करिव १ करोड मूल्य बराबरको मेसिनमा स्क्यान गरिएको सामानमा भित्र अवैध वस्तु भए तत्काल देखिन्छ । सोहीअनुसार चेक गर्न सहज हुने भन्सार प्रमुख अर्यालले बताए । यसै नाकामा भन्सारको निगरानीमा ३२ वटा सीसी क्यामेरासमेत विभिन्न क्षेत्रमा जडान गरिएकाले तस्करी रोक्न अझै सहज भएको बताइएको छ ।
प्रतिक्रिया दिनुहोस !
