काठमाडौँ र पोखराबाट चोरिएका मोटरसाइकल चितवनमा, प्रहरीले तीनवटा फिर्ता गर्यो
चितवन : प्रदेश नम्बर ३ प्रहरी कार्यालय हेटौंडाले चितवनका विभिन्न स्थानबाट चोरिएका मोटरसाइकल फेला पारेर सम्बन्धित धनीलाई बुझाएको छ ।
प्रदेश प्रहरी क्षेत्रीय अनुसन्धान समुहबाट खटिएको प्रहरी टोलीले चितवनका विभिन्न स्थानबाट असार २५ गते बरामद भएका चोरीका साधनमध्ये तीनथान मोटरसाइकल सम्बन्धित धनीलाई बुझाएको हो ।
कार्यालयका निमित्त प्रमुख प्रहरी उपरीक्षक दिपेन्द्र जिसीले बरामद भएका मोटरसाइकल सम्बन्धित धनीलाई हस्तान्तरण गरेका हुन् ।
काठमाडौँको पेप्सीकोलाबाट हराएको कालो रंगको १५० सिसीको पल्सर र काठमाडौँकै ठमेलबाट हराएको २०० सिसीको कालो रातो रंगको एनएस पल्सर र पोखराबाट हराएको कालो रातो रंगको २०० सिसीको एनएस पल्सर सम्बन्धित धनीलाई जिम्मा लगाइएको हो ।
चोरिएका ६ वटा मोटरसाइकल वास्तविक नम्बर फेरेर भरतपुरका विभिन्न अस्पताल कम्पाउण्डमा वेवारिसे अवस्थामा पार्किङ गरेको अवस्थामा प्रहरी निरीक्षक रोशन थापाको कमाण्डमा खटिएको टोलीले भेट्टाएको थियो । टोलीले त्यसक्रममा चोरी भएको एउटा बोलेरो गाडी पनि बरामद गरेको थियो ।
बरामद भएका अन्य मोटरसाइकलहरुको वास्तविक धनी खोज्ने क्रम भइरहेको थापाले बताए । चोरीमा संलग्नहरुबारे पनि पनि अनुसन्धान भइरहेको प्रहरीले जनाएको छ ।