गाउँपालिकाको कार्यालय बन्द गरेर भ्रमणमा जनप्रतिनिधि
वीरगन्ज : पर्साको जीराभवानी गाउँपालिकाका प्रमुख, उपप्रमुख र कर्मचारी र शुक्रवारदेखि कार्यालय नै बन्द गरेर अवलोकन भ्रमणमा जिल्ल्ला बाहिर गएका छन् ।
गाउँपालिकाका प्रमुख रामप्रित महतो थारु, उपप्रमुख उषा चौधरी, पाँच वटै वडाका सदस्य र १५ जना कर्मचारीसहित ४० जनाको टोली अवलोकन भ्रमणमा जाँदा शुक्रवारदेखि गाउँपालिकाको काम ठप्प छ ।
गाउँपालिका कार्यालयमा कुल १८ जना कर्मचारी कार्यरत छन् । तीमध्ये इन्जिनियर, आइटी अफिसर, स्वास्थ्य संयोजक, सह संयोजक, पशु चिकित्सक, नायव सुब्बा, लेखापाल, सब–इन्जिनियर, सामाजिक परिचालक, खरिदार, शिक्षा संयोजक, कृषि प्राविधिकसहित १५ कर्मचारी लिएर गाउँपालिका प्रमुख थारु शुक्रवारदेखि चितवन, पोखरा र लुम्बिनीको पाँच दिने भ्रमणमा गएका हुन् ।
भ्रमणमा नगएका गाउँपालिकाका प्रमुख प्रशासकीय अधिकृत अमित गिरी तथा कार्यालय सहायकद्वय मनोजकुमार दास र नागेन्द्र महतो पनि शुक्रवारदेखि कार्यालयमा आएका छैनन् ।
गाउँपालिका कार्यालयले उपलब्ध गराएको प्रमुख प्रशासकीय अधिकृत गिरीको ९८५५०१५१०० नम्बरको मोबाइल फोन पनि शुक्रवारदेखि स्विच अफ छ । भ्रमणको खर्च ६ लाख रुपैयाँ पनि गाउँपालिकाकै बजेटबाट निकासा गरिएको छ ।
गाउँपालिकाका प्रमुख, उपप्रमुख, वडा सदस्य र अधिकांश कर्मचारी जिल्ला बाहिर भ्रमणमा गएकाले गाउँपालिकाको कार्यालय शुक्रवारदेखि बन्द हुँदा सेवा लिन पुगेका सेवाग्राही रित्तै फर्कन बाध्य भएका छन् ।
गाउँपालिका कार्यालय बन्द हुँदा सेवाग्राहीहरु काम हुन नसकेपछि निराश भएर फर्कन बाध्य भएको गाउँपालिका कार्यालय अगाडि घर भएका स्थानीय ओम प्रकाश चौधरीले बताए ।
‘अध्यक्ष, उपाध्यक्षसहित सबै कर्मचारी शुक्रवार देखि भ्रमणमा गएकाले त्यही दिनदेखि कार्यालय बन्द छ’, उनले भने, ‘हरेक दिन १५÷२० जना मान्छे काम लिएर आउँछन्, तर कार्यालय बन्द भएको देखेपछि निराश भएर फर्कन्छन् ।’
जिरा भवानी गाउँपालिका वडा नम्बर १ का अध्यक्ष शेख नमुना आजमाले पनि गाउँपालिका कार्यालय नै बन्द गरेर प्रमुख, उपप्रमुख सहित अधिकांश कर्मचारी एकै पटक जिल्ला बाहिर भ्रमणमा जानु गलत भएको बताए ।
गाउँपालिकाका प्रमुख रामप्रति महतो थारुले भने आफूहरू अवलोकन भ्रमणका लागि जिल्ला बाहिर आएकाले कार्यालय बन्द रहेको बताए ।
जिल्ला बाहिरको भ्रमणमा रहेका थारुले टेलिफोनमा अन्नपूर्णकर्मीसँग भने,‘हामी सबै भ्रमणमा आएका छौँ, त्यसैले कार्यालय बन्द भएको हो, एक दुई दिनमा फर्किएपछि कार्यालय खुल्छ ।’
भ्रमणको शीर्षक र रकमबारे जिज्ञासा राख्दा उनले भने, ‘यो कुरा मलाई थाहा छैन, प्रमुख प्रशासकीय अधिकृतलाई सोध्नुस्, उनले नै भ्रमणको सबै प्रबन्ध मिलाएर हामीलाई पठाएका हुन् ।’