राजविराजः मैथिली चलचित्रका निर्देशक धर्मेन्द्र यादव ‘धर्मात्मा’ को उपचारको क्रममा निधन भएको छ । सप्तरीको छिन्नमस्ता गाउँपालिका–७ मोहनपुरका यादवको उपचारको क्रममा मंगलबार काठमाडौँस्थित सिभिल अस्पतालमा २७ वर्षको अल्पायुमा निधन भएको कलाकार सञ्जय कार्कीले जानकारी दिए ।
उनी मधुमेह र रक्तचाप रोगबाट ग्रसित थिए । पछिल्लो समय यादव ‘कलंक’ नामक मैथिली चलचित्रको निर्माणमा व्यस्त थिए ।
एक दशकदेखि मैथिली कलाक्षेत्रमा सक्रिय रहँदै आएका उनी निर्देशन तथा अभिनयमा सक्रिय थिए । छोटो समयमै मैथिली कलाक्षेत्रमा पहिचान बनाउन सफल यादवले धर्मेन्द्र धर्मात्मा फिल्म प्रोडक्सन प्रालिको व्यानरमा राधासँग मोहन, जान सन, हिरो तोहर दिवाना, प्रेमरोग जस्ता चलचित्रहरुको निर्माण गरेका छन् । पछिल्लो समय ‘कलंक’ नामक मैथिली फिल्म छायांकनमा व्यस्त रहेका उनी अचानक गम्भीर विरामी परेका थिए ।
मैथिली कलाक्षेत्रको विकासका साथै कलाकारलाई व्यवसायिकतातर्फ उन्मुख गराउने अभियानमा जुटेका धर्मात्माले ‘मैथिली खुशी’ युट्युब च्यानलमार्फत मैथिली हास्यव्यंग्यमा विभिन्न विषयवस्तुलाई आधार बनाएर करिब दुई सय श्रृंखला समेत निर्माण गरेका छन् ।
मैथिलीमा सर्वाधिक हेरिने च्यानलको रुपमा स्थापित उनको च्यानलमा तीन लाख ५४ हजार सात सय १४ सब्सक्राइबर रहेका छन् ।
मानसरोवर यादव एवम् मिनादेवी यादवका सुपुत्र यादवका पत्नी रेखा यादव, ६ वर्षका छोरा शंकर र डेढ वर्षको छोरी छिन् । सामान्य परिवारमा जन्मिएका उनी सानैदेखि कलाक्षेत्रतर्फ आकर्षित हुँदै मैथिली कलाक्षेत्रमा समर्पित थिए ।उनको निधनले सिङ्गो मैथिली कलाक्षेत्रमा अपुरणीय क्षति पुगेको भन्दै सिङ्गो मिथिला क्षेत्रका कलाकर्मीहरु स्तब्ध बनेका छन् ।
प्रतिक्रिया दिनुहोस !
