जकार्ता (इन्डोनेसिया) : एसियाली खेलकुद प्रतियोगिताको १८औं संस्करणमा नेपालले पदक जित्ने सम्भावना झिनो बन्दै गएको छ । पदकको आशा गरिएका खेलहरूले एकपछि अर्को निराशाजनक प्रदर्शन गरेपछि जारी एसियाडबाट नेपाली टोली रित्तो हात घर फर्कने सम्भावना बढेको हो ।
इन्डोनेसियाबाट रित्तो हात घर फर्किए नेपाली टोली एसियाली खेलकुदको इतिहासमा ३२ वर्षपछि पहिलो पटक पदकविहीन हुनेछ । सन् १९८६ मा दक्षिण कोरियाको सोलमा आयोजना भएको १०औं संस्करणपछि नेपालले एसियाली खेलकुदमा नियमित रूपमा पदक जित्दै आएको छ ।
दसौं संस्करणयता एसियाली खेलकुदमा नेपालले हालसम्म एक रजत र २२ कांस्य गरी कुल २३ वटा पदक जितेको छ । नेपाललाई तेक्वान्दोले एक ऐतिहासिक रजतसहित १४, बक्सिङले ६ र कराँतेले तीनवटा पदक चुमाएका छन् ।
अहिले पनि यिनै तीन खेलमा बढी भर पर्दै एसियाड यात्रामा होमिएको नेपालले नवौं दिनको खेल सकिँदासम्म पनि पदक तालिकामा आफ्नो उपस्थिति दर्ता गराउन सकेको छैन । नेपाललाई एउटा पनि पदक नदिलाई तेक्वान्दोका १३ वटै स्पर्धा सकिएका छन् भने कराँते र बक्सिङमा पनि नेपाली खेलाडीको प्रदर्शन अत्यन्तै निराशाजनक देखिएको छ ।
कराँतेले सहभागिता जनाएको आठमध्ये ६ वटा स्पर्धा सकिएका छन् भने बाँकी दुई स्पर्धा सोमबार खेलाइनेछ । ती दुई स्पर्धामा पनि पदक जित्न नसके जारी एसियाडमा कराँतेबाट पनि नेपाललाई निराशामात्र हात लाग्नेछ ।
कराँतेको पहिलो दिन शनिबार तीनवटा स्पर्धामा पराजित भएको नेपालले आइतबार थप तीनवटा स्पर्धामा पराजय बेहो¥यो । कुमुतेअन्तर्गत पुरुषतर्फको ६० केजीभन्दा मुनिको तौलसमूहमा नेपाली खेलाडी सोनम लामा आफ्नो पहिलो खेलमै पराजित भए । सोनमलाई भियतनामका खेलाडी नाग्युन भान हाईले ०-३ अंकले पाखा लगाए । उनी पहिलो चरणमा बाई पाएर सोझै दोस्रो चरणमा पुगेका थिए ।
बक्सिङको पुरुष ६९ केजी तौलसमूहमा कतारका खेलाडीविरुद्ध प्रतिस्पर्धा गर्दै नेपालका विष्णुप्रसाद घले गुरुङ (रातो) । तस्बिर सौजन्यः लोकेन्द्रकुमार बस्नेत
यसैगरी पुरुषतर्फकै ६७ केजीभन्दा मुनिको तौलसमूहमा पनि नेपालको नतिजा सन्तोषजनक रहेन । उक्त स्पर्धामा नेपालका विजय लामा तुलनात्मक रूपमा बलियो जापानी प्रतिद्वन्द्वी सिमोहारा हिरोतोसँग पराजित भए । खेलको प्रारम्भदेखि नै नेपाली खेलाडीको गतिलो चुनौतीको सामना गरेका जापानी खेलाडी अन्ततः १-० अंकले विजयी भए ।
आइतबार नै भएको महिलातर्फको ६१ केजीभन्दा मुनिको तौलसमूहमा पनि नेपाली खेलाडी सुनिता महर्जन पराजय व्यहोर्न बाध्य भइन् । सुनितालाई थाइल्यान्डकी खेलाडी सुकिब आरमले १-४ अंकले पराजित गरेकी थिइन् ।
यसैगरी बक्सिङमा पनि नेपाली खेलाडीको प्रदर्शन आशालाग्दो भएन । पुरुष फ्लाइवेट ५२ केजी तौलसमूहको प्रिक्वार्टरफाइनलमा नेपालका प्रेम चौधरीलाई फिलिपिनो मुक्केबाज रोगेन ल्याडनले ०-५ अंकले पराजित गरे ।
पुरुषतर्फकै वेल्टरवेट ६९ केजी तौलसमूहमा पनि नेपाली मुक्केबाज विष्णुप्रसाद गुरुङ आफ्नो प्रतिद्वन्द्वीसामु निरीह देखिए । उक्त भिडन्तमा कतारका बक्सर थारुमालिङ्गम थुलासिमारनले विष्णुलाई ५-० अंकले पराजित गरे । महिलातर्फको फ्लाइवेट ५१ केजी तौलसमूहमा नेपालकी विमला श्रेष्ठ मंगोलियाकी जार्गलान अर्चिबतसँग ४-१ अंकले पराजित भइन् ।
यसैगरी आइतबारदेखि नै सुरु भएको टेबुलटेनिसमा पनि नेपाली खेलाडीले गतिलो प्रदर्शन गर्न सकेनन् । महिला टिम स्पर्धामा समूह ‘डी’ बाट प्रतिस्पर्धा गरेको नेपाल आफ्नो दुवै खेलमा पराजित भयो । नेपाली महिला टोलीलाई मलेसियाले ३-० र सिंगापुरले पनि ३-० ले नै पराजित गरे ।
टेबुलटेनिसको पुरुष टिम स्पर्धामा पनि नेपालले आइतबार आफ्नो दुवै खेलमा पराजय भोग्यो । नेपाली टोली आफ्नो पहिलो खेलमा बलियो प्रतिद्वन्द्वी चीनसँग ३-० को सोझो सेटमा पराजित भयो । दोस्रो खेलमा भने नेपाली टोलीलाई मलेसियाले ३-० ले पराजित ग¥यो ।
प्याराग्लाइडिङमा भने नेपालले पदक जित्ने सम्भावना कायमै राखेको छ । प्याराग्लाइडिङको पुरुष टिम क्रसकन्ट्री स्पर्धाको दोस्रो चरणको खेल सकिँदासम्म नेपाल तेस्रो स्थानमा आसीन छ । उक्त स्पर्धामा १० टोली सहभागी छन् । नेपाली टोलीमा विमल अधिकारी, विजय गौतम, सुशील गुरुङ, युकेश गुरुङ र विशाल थापा सहभागी छन् । पुरुषतर्फ इन्डोनेसिया पहिलो र दक्षिण कोरिया दोस्रो स्थानमा छन् ।
सोही स्पर्धाको महिलातर्फ भने दोस्रो चरणको खेल सकिँदासम्म नेपाल पाँचौं स्थानमा छ । महिलातर्फ पनि १० टोली सहभागी छन् । नेपाली महिला टोलीमा प्रतिभा भुजेल, तृषा तामाङ र सविता तामाङ सहभागी छन् । महिलातर्फ दक्षिण कोरिया पहिलो, जापान दोस्रो, इन्डोनेसिया तेस्रो र थाइल्यान्ड चौथो स्थानमा छन् ।
यसैगरी आइतबार भएको भारोत्तोलनमा नेपाली खेलाडी तारादेवी पुन उपाधि होडबाट बाहिरिए पनि पाँचवटा नयाँ राष्ट्रिय कीर्तिमान बनाउन सफल भएकी छन् । महिलातर्फको ७५ केजी तौलसमूहमा तारा सहभागी १० खेलाडीमध्ये आठौं स्थानमा रहिन् । उक्त स्पर्धामा उत्तर कोरियाकी रिङ जोम सिमले कुल दुई सय ६३ केजी तौल उचाल्दै स्वर्ण, उज्बेकिस्तानकी ओताकजियभा ओमाडोयले दुई सय ३७ केजी तौल उचाल्दै रजत र दक्षिण कोरियाकी मुन मिन्हीले दुई सय ३६ केजी भार उचाल्दै कांस्य पदक हात पारे ।
नेपालकी ३४ वर्षीया अनुभवी खेलाडी ताराले स्न्याचतर्फ ७४ र क्लिन एन्ड जर्कतर्फ एक सय एक गरी कुल एक सय ७५ केजी तौल उचालिन् । स्न्याचतर्फ पहिलो लिफ्टमा ७० केजी तौल उचालेकी तारा दोस्रो लिफ्टमा ७४ केजी भार उचाल्न असफल भएकी थिइन् । तर, उनले तेस्रो लिफ्टमा भने ७४ केजी तौल उचालिन् ।
यसैगरी क्लिन एन्ड जर्कतर्फ पहिलो लिफ्टमा ९३ केजी उचालेकी ताराले दोस्रो लिफ्टमा ९८ र तेस्रो लिफ्टमा एक सय एक केजी भार वहन गरेकी थिइन् । १२औं दक्षिण एसियाली खेलकुदकी कांस्य पदक विजेता ताराले आफ्नै नाममा रहेको कीर्तिमान तोडेकी हुन् ।
यसअघि स्न्याचमा तारको नाममा ७३ केजीको कीर्तिमान थियो । ताराले स्न्याचको तेस्रो लिफ्टमा कीर्तिमान बनाएकी हुन् । उनले नेपालगन्जमा गत जेठमा सम्पन्न एसियाली खेलकुदको छनोटमा उक्त कीर्तिमान बनाएकी थिइन् । क्लिन एन्ड जर्कमा यसअघि ताराको नाममा ९७ केजीको कीर्तिमान थियो ।
एसियाडमा भारोत्तोलनतर्फ नेपालको प्रतिस्पर्धा पनि सकिएको थियो । प्रतियोगितामा तारासहित चारजना भारोत्तोलन खेलाडीले सहभागिता जनाएका थिए । तारासँगै कमलबहादुर अधिकारी र सञ्जु चौधरीले पनि कीर्तिमान बनाएका थिए ।
यसैगरी एसियाली खेलकुदमा पहिलो पटक सहभागिता जनाएको सेपाकताक्रोको पुरुष रेगु स्पर्धामा नेपाललाई चीनले २१-४, २१-९ ले हरायो । यसअघि मलेसिया र दक्षिण कोरियाले पनि नेपालाई हराएका थिए । नेपालले सोमबार भारतसँग खेल्नेछ ।
प्रतिक्रिया दिनुहोस !
