राजविराज : बहुविवाह आरोपमा पक्राउ परेका एक जोडी धरौटी बुझाउन नसक्दा बुधबार जेल चलान भएका छन् । बहुविवाहको आरोपमा सप्तरीको कञ्चनरुप नगरपालिका १० घोघनपुरका २५ वर्षीय दुखी राम र २३ वर्षीया ममताकुमारी उराव गत साउन १८ गते पक्राउ परेका थिए ।
जिल्ला अदालतले मागेको धरौटी बुझाउन नसक्दा उनीहरुलाई राजविराज कारागारमा पठाइएको जिल्ला अदालतका श्रेस्तेदार दिलकुमार बर्देवाले बताए । जिल्ला न्यायाधीश कमलप्रसाद ज्ञवालीले रामसँग २५ हजार र उरावसँग १५ हजार धरौटी माग गरेका थिए ।
जेठी श्रीमति २१ वर्षीया उर्मिलादेबी रामले उनका श्रीमान् दुखी र ममताले शम्भुनाथ नगरपालिका–१ स्थित शम्भुनाथ मन्दिरमा वैशाख ९ गते बहुविवाह गरेको भन्दै जिल्ला प्रहरी कार्यालयमा उजुरी दिएकी थिइन् ।
प्रतिक्रिया दिनुहोस !
