वीरगन्ज : बाराको सिम्रौनगढ नगरपालिकाको कार्यालय, आइतबारदेखि मेयर, उपमेयर र प्रमुख प्रशासकीय अधिकृतविहीन बनेको छ । मेयर विजय शंकर यादव , गत सोमबार देखि चीन भ्रमणमा गएका छन् । उपमेयर रिमा देवी पनि आइतवारदेखि बाबाधाम दर्शनका लागि धार्मिक यात्रामा आइतवार देखि भारतको झारखण्ड गएकी छन् ।
प्रमुख प्रशासकीय अधिकृत शम्भु साह भने गत भदौ २८ गते देखि असोज ७ गते सम्म ११ दिनको बिदामा बसेका छन् । स्वास्थ्य उपचारका लागि दिल्ली जानु पर्ने भन्दै प्रमुख प्रसाशकीय अधिकृत साहले ११ दिनको विदा लिएका हुन् ।
चीन भ्रमणमा रहेका मेयर यादव आगामी बुधबार मात्र कार्यालयमा आइ पुग्ने उनका स्वकीय सचिव गुड्डु यादवले जानकारी दिए । धार्मिक यात्रामा गएकी उपमेयर रिमा देवी पनि ५÷६ दिन पछि मात्र फर्किने कार्यालय प्रशासन फाँटका खरिदार सुरेश यादवले बताए । नगरपालिकाका मेयर र उपमेयर भ्रमणमा गएकै बेला प्रमुख प्रशासकीय अधिकृत पनि ११ दिनको विदामा बस्दा कार्यालय सुनसान भएको छ ।
नीतिगत निर्णय गर्ने मेयर र उपमेयर तथा ती निर्णय कार्यान्वयन गराउने प्रमुख प्रशासकीय अधिकृत पनि कार्यालयमा नहुदा सेवाका लागि कार्यालयमा पुग्ने सेवाग्रहीहरू काम नै नगराइ फर्कन बाध्य भइरहेका छन् । ११ दिनको विादमा रहेका प्रमुख प्रशाकीय अधिकृत साहले निमित्तको कार्यभार शिक्षा फाँटका अधिकृत बजृ किशोर साहलाइ दिएका छन् । तर मेयर र उपमेयर भ्रमणमा गएका बेला शिक्षा फाँटका अधिकृत साह पनि कार्यालयकै कामले अधिकांश समय कार्यालयबाहिर रहने गरेकाले कार्यालयको सेवा प्रभावित भएको प्रशासन फाँटका खरिदार सुरेश यादवले बताए । सिम्रौनगढ नगरपालिकाको कार्यालयमा कार्यरत अन्य अधिकांश कर्मचारीहरू पनि नियमित रूपमा कार्यालयमा नआउने गरेका कारण कार्यालयको कामकाजमा असर पर्दै आएको स्थानीय सेवाग्राहीहरूको गुनासो छ ।
सिम्रौनगढ नगरपालिकाको कार्यालयमा प्रमुख प्रशाकीय अधिकृत सहित २५ जना कर्मचारी कार्यरत छन् । प्रशासन फाँटका खरिदार सुरेश यादवका अनुसार , सिम्रौनगढ नगरपालिकाको कार्यालयमा कार्यालयमा एक प्रशासकीय अधिकृत , तीन प्राविधीक , तीन सुब्बा , तीन खरिदार , तीन अधिकृत , एक लेखापाल, पाच कार्यालय सहायक , तीन चालक , एक मेस्तर गरि २५ जना कर्मचारी कार्यरत छन् ।
तर ती मध्ये ११÷१२ जना मात्र कर्मचारीहरू कार्यालयमा भेटिने गरेका छन् । अधिकांश कर्मचारी , विदा र कार्यालयको काममा बाहिर जानु पर्ने कारण देखाउदै कार्यालयमा नआउने गरेका कारण सेवाग्राहीहरू मर्कामा पर्दै आएका छन् ।
कार्यालयमा आउने कर्मचारीहरू पनि बिहान ११ बजेपछि मात्र आउने गरेको युवा विधार्थी संघर्ष समिति सिम्रौनगढका अध्यक्ष उमेश कुशवाहाले बताए ।
कर्मचारीहरू कार्यालयमा अनिवार्य रूपमा बिहान १० बजे नै आइपुग्नुपर्ने नियम छ, कुशवाहाले भने । तर अधिकांश कर्मचारी बिहान ११ बजेपछि मात्र आउने गरेका छन् ।
नगरपालिकाको कार्यालयमा आइतवार एक जना सेवाग्राीहीको काम लिएर जादा ११ जना कर्मचारीहरू मात्र कार्यालयमा भेटिए, कुशवाहाले भने ,‘ ती मध्ये बृजकिशोर साह र जितेन्द्र प्रसाद यादव गरि दुइ जना कर्मचारी मात्र बिहान १० बजे कार्यालयमा आएका थिए , बाँकी नौ जना कर्मचारीहरू भने ११ बजे पछि मात्र कार्यालयमा आए । सिम्रौनगढ नगरपालिकाको कार्यालयमा २५ जना कर्मचारी कार्यरत रहेकोमा कार्यालयमा आलोपालो गरि ११÷१२ जना मात्र कर्मचारीहरू आउने गरेको कुशवाहाले बताए ।
प्रतिक्रिया दिनुहोस !
