काठमाडौं : राष्ट्रिय सतर्कता केन्द्रमा बजेट र जनशक्ति अभाव हुँदा प्राविधिक परीक्षणको काम प्रभावित हुने भएको छ । सरकारले चालू आर्थिक वर्षका लागि केन्द्रको झन्डै ४० प्रतिशत बजेट कटौती गरेको थियो । हचुवाका आधारमा बजेट कटौती गर्दा केन्द्रका महत्वपूर्ण कार्य प्रभावित भएको केन्द्रले जनाएको छ ।
केन्द्रले सरकारद्वारा सञ्चालित राष्ट्रिय गौरवका आयोजनाहरूमा उचित किसिमले काम भए÷नभएको प्राविधिक परीक्षण गर्छ । ५० करोडभन्दा माथिका सरकारी आयोजनाको प्राविधिक परीक्षण गर्ने जिम्मेवारी पनि केन्द्रकै हो । महत्वपूर्ण जिम्मेवारी बोकेको केन्द्रको भूमिका बढाउन प्रधानमन्त्री तथा मन्त्रिपरिषद् कार्यालयले बेवास्ता गर्दै आएको छ ।
प्रधानमन्त्री कार्यालयको बेवास्ताका कारण केन्द्रले काम प्रभावकारी रूपमा अघि बढाउन सकेको छैन । सरकारी कार्यालयका अनियमितता छानबिन गर्ने, सम्पत्ति विवरण अध्ययन गर्ने, कर्मचारीलाई समयबारे जिम्मेवार बनाउनेलगायत महत्वपूर्ण कार्यसमेत गर्दै आएको छ । तर, बजेट र जनशक्ति अभावमा कार्यालयले सम्पादन गर्ने यी काम प्रभावित हुने देखिएको छ । केन्द्रका प्रवक्ता विष्णुराज लामिछानेले बजेट कटौती हुँदा केन्द्रले सम्पादन गर्नेमा प्रभाव असर गरेको बताए ।
सतर्कता केन्द्रले गत वर्ष राष्ट्रिय गौरवलगायत एक सयभन्दा बढी आयोजनाको प्राविधिक परीक्षण गरेको थियो । प्राविधिक परीक्षण गर्दा आयोजनाको लागत, समय, गुणस्तर, प्रभावकारिता, र प्राप्त उपलब्धिसमेत परीक्षण गर्ने गरिएको छ । परीक्षणपछि आयोजनामा देखिएका त्रुटि औंल्याउँदै ठेकेदार कम्पनीलाई सचेत पार्ने काम केन्द्रले गर्दै आएको छ । सचेत पार्दा पनि त्रुटि नसच्याए कारबाहीका लागि सिफारिससमेत गर्ने गरिएको छ ।
केन्द्रको प्राविधिक परीक्षण हेर्ने महाशाखा ६ महिनादेखि नेतृत्वविहीन छ । सरकारले गत वैशाखमा महाशाखाकी प्रमुख इन्जिनियर प्रमिलादेवी वज्राचार्यलाई भौतिक पूर्वाधार तथा यातायात मन्त्रालयमा सरुवा गरेको थियो । तर उनको ठाउँमा अन्य इन्जिनियरलाई पठाउन नसक्दा प्राविधिक परीक्षणको काम अवरुद्ध जस्तै बन्न पुगेको छ । केन्द्रका प्रवक्ता लामिछानेले केन्द्रको प्राविधिक महाशाखालगायत सबै शाखामा आवश्यक जनशक्ति पूर्ति गर्नुपर्ने बताए । ‘जनशक्ति अभावमा प्राविधिक परीक्षणलगायत महत्वपूर्ण कार्यले गति लिन सकेको छैन’, प्रवक्ता लामिछानेले बताए । बजेट अभावले प्राविधिक परीक्षणको झन्डै आधा काम घट्ने भएको छ । काम घट्ने हुँदा महत्वपूर्ण आयोजनाले गरेका त्रुटि समयमै औंल्याउन नसकिने अवस्था रहेको केन्द्रले जनाएको छ । सरकारले केन्द्रलाई उच्च प्राथमिकतामा राख्नुपर्ने उनले बताए । ‘बजेट र जनशक्ति अभावमा पनि नियमित काम भने जारी राखेका छौं’, लामिछानेले भने ।
प्रतिक्रिया दिनुहोस !
