काठमाडौं : पछिल्लो समयमा फोहोरमैला व्यवस्थापन सहरको प्रमुख चुनौतीका रूपमा देखिन थालेको छ । विश्व बसोवास दिवसका अवसरमा सोमबार आयोजित कार्यक्रममा नेपालका २ सय ९३ वटा नगरपालिकाको सहरी क्षेत्रमा चुनौतीका रूपमा रहेको फोहोरमैलाको उचित र वैज्ञानिक किसिमले व्यवस्थापन गर्न संघ, प्रदेश र स्थानीय तहले सहकार्य गरेर अघि बढ्नुपर्नेमा सरोकारवालाले जोड दिएका छन् ।
संविधानले स्थानीय तहलाई फोहोरमैला व्यवस्थापनको जिम्मा दिए पनि उनीहरू एक्लैले गर्न सकेका छैनन् । सहरी विकास मन्त्रालयले स्थानीय तहसँग फोहोर व्यवस्थापनमा सहकार्य गर्न तयार रहेको बताएको छ ।
स्थानीय तहसँग फोहोरमैला व्यवस्थापन मन्त्रालयमा सहकार्य गर्न तयार रहेको सहरी विकासमन्त्री मो. इस्तियाक राईको भनाइ छ । मन्त्रालयले दिएको रकमबाट सडक र ढलका साथै फोहोरमैला व्यवस्थापन गर्न उनले स्थानीय निकायलाई निर्देशनसमेत दिए । त्यसका लागि चालू आर्थिक वर्षमा नगरपालिकालाई २ अर्ब लगानी गर्न लागिएको पनि उनले जानकारी दिए ।
नेपाल नगरपालिका संघका अध्यक्ष अशोक ब्यन्जुले नयाँ सहरका रूपमा विकास हुँदै गएका नगरपालिकामा फोहोरमैला व्यवस्था ठूलो समस्या हुँदै गएको बताए । सबै नगरपालिकामा पैसा छरेर उपलब्धि नहुने र क्रमबद्ध रूपमा नगरपालिकालाई सफा बनाउने अभियान सञ्चालन गर्नुपर्नेमा उनले जोड दिए ।
फोहोरलाई मोहरमा परिणत गर्नुपर्ने मन्त्रालयका सचिव दीपेन्द्रनाथ शर्माले बताए । फोहोर व्यवस्थापनको केन्द्रीय निकाय फोहोरमैला स्रोत तथा परिचालन केन्द्र खारेज गरिएकोमा उनले असन्तुष्टिसमेत व्यक्त गरे । माफिया हाबी भएर केन्द्र खारेज गरिए पनि त्यो सञ्चालन हुनुपर्ने उनको भनाइ छ । यूएन ह्याबिट्यासका कार्यक्रम प्रबन्धक पद्मसुन्दर जोशीले ई–वेस्ट पनि नेपालमा समस्या बन्दै गएको बताए ।
‘सहरी फोहोरमैला व्यवस्थापन’ भन्ने नाराका साथ विश्व बसोवास दिवसको नारा २०७५ मनाइएको छ ।
प्रतिक्रिया दिनुहोस !
