काठमाडौं : अख्तियार दुरुपयोग अनुसन्धान आयोगले पदीय दुरुपयोग गर्दै ३ करोड भन्दा रकम बढी आर्जन गर्ने शहरी विकास तथा भवन डिभिजन कार्यालय रुपन्देहीका प्रमुख सिनियर डिभिजनल इञ्जिनियर सुरेश ठाकुरविरुद्ध अकूत सम्पत्ति आर्जनको अभियोगमा मुद्दा दायर गरेको छ ।
छानबिनमा ठाकुरको ३ करोड १८ लाख ७३ हजार ७ सय २० रुपैयाँ बराबरको सम्पत्तिको स्रोत नखुलेको पाइएपछि उनीविरुद्ध आइतबार विशेष अदालतमा आरोपपत्र दायर गरिएको अख्तियारका प्रवक्ता रामेश्वर दंगालले जानकारी दिए ।
अख्तियारले ठाकुरको स्रोत नखुलेका सबै सम्पत्तिलाई बिगो कायम गर्दै जफत गर्न र २ वर्षसम्म जेल सजाय माग गर्दै मुद्दा दायर गरेको हो । ठाकुरको अवैध कमाईमा सहयोग पुर्याउने श्रीमति अनिता ठाकुर, सन्तोष ठाकुर, बलराम उपाध्याय र मिनाक्षी सिन्हाविरुद्ध पनि भ्रष्टचार मुद्दा दायर गरिएको छ ।
गैरकानुनी सम्पत्ति आर्जनमा पक्राउ परेका ठाकुरलाई अख्तियारले आइतबार विशेष अदातमा बुझाएको छ । मतियार चारजना फरार छन् । अख्तियारले ठाकुरलाई गत साउन १२ मा कार्यकक्षबाटै पक्राउ गरेको थियो । अख्तियारले उनको कार्यालय र निवासमा छापा मारी १ लाख ८ हजार ५ सय सय नेपाली, ८ हजार १ सय भारतीय रुपैयाँ, १ हजार ५० युएस डलर तथा ४ सय ८५ युरो बरामद गरेको थियो ।
सुरेशका मतियार बलराम उपाध्यायको प्राइम बैंकको खाताको ६६ लाख ५० हजार रुपैयाँ पनि अख्तियारले बरामद गरेको छ । बरामद सबै रकम ठाकुरले अनियमितता गरेको दसी प्रमाणको रूपमा विशेष अदालतमा पेश गरिएको अख्तियार प्रवक्ता दंगालले जानकारी दिए ।
यस्तो थियो धन्दा
अख्तियारका अनुसन्धान अधिकृतकाअनुसार ठाकुरले कार्यालय प्रमुख भएसँगै निर्माण व्यवसायीसँग रकम असुल्ने थालेका थिए । हरेक ठेक्का पट्टामा उनले मोटो कमिसन माग्थे । मागे अनुसारको कमिसन नपाए उनले काम र भुक्तानी रोक्ने गरेका थिए । २०५९ माघ १ मा सरकारी सेवामा प्रवेश गरेका ठाकुरको सम्पत्ति छानबिनबाट ७५ लाख १ हजार २ सय ७ रुपैयाँ मात्रै वैध रहेको पाइयो । यो अवधिमा ठाकुरले श्रीमति, परिवारका अन्य सदस्यका नाममा चल अचल सम्पत्ति जोडेको तथा शेयर लगानी बीमा, बैंक मौज्दातलगायतका शीर्षकमा ३ करोड १८ लाख ७३ हजार ७ सय रुपैयाँ लगानी गरेको र ती सबै रकमको स्रोत नखुलेको अनुसन्धानले देखाएको छ ।
यसरी पर्दाफास भयो भ्रष्टाचार
ठाकुरले गाडी रिजर्भ गरेर ५० लाख रुपैयाँ बाहिर पठाउ“दैछन् भन्ने सूचना आए लगत्तै आयोगले बुटवल, हेटौंडा र पथलैयामा तीनतिर एम्बुस थापेको थियो । हेटांैडामा ट्याक्सी रिभर्ज गरेर आएका एक महिला र दुई पुरुषलाई अख्तियारको विशेष टोलीले फेला पार्यो । ट्याक्सीलाई नाका प्रहरी कार्र्यालयमा लगेपछि जनप्रतिनिधिसमेत राखी गाडी खान तलासी गर्दा २४ लाख बैंकमा जम्मा गरेको भौचर र १२ लाख ५० हजार नगद भेटिएको थियो ।
अनुसन्धानबाट ठाकुरले बलराम उपाध्यायलगायत अन्य व्यक्तिका नाममा बैंकमा खाता खोलेर ८० लाख भन्दा बढी रकम राखेको खुलेको छ । ती खातावालले रकम आफ्नो नभएर डिभिजनल इन्जिनियरको भएको जानकारी अख्तियार टोलीलाई गराए । अख्तियारको विशेष इन्टिलिजेन्स टिमले यो सबै तथ्य पत्ता लगाएपछि उनलाई पक्राउ गरेको थियो ।
प्रतिक्रिया दिनुहोस !
