राजविराज : सप्तरीको बोदे बर्साइन नगरपालिकामा बुधबार २५ वर्षीया महिलाको रहस्यमय मृत्यु भएको छ । विषादी सेवनबाट बोदे बर्साइन नगरपालिका ७ की आरतीकुमारी यादवको शंकास्पद मृत्यु भएको सप्तरी प्रहरीले जनाएको छ ।
घटनालगत्तै इलाका प्रहरी कार्यालय बोदे बसाईनले मृतकका श्रीमान ३० वर्षीय सुरेश यादव र ससुरा ५५ वर्षीय रामदेव यादवलाई अनुसन्धानका लागि नियन्त्रणमा लिएको छ ।
इलाका प्रहरी कार्यालय बोदे बर्साइनका अनुसार धान, तरकारीमा छर्कने ब्लुम नामक विषादीको बट्टा मृतकको घरबाट बरामद गरिएको छ । पाँच वर्षदेखि वैदेशिक रोजगारका लागि मलेसियामा रहेका अशोकले विदेशमै बिहे गरेको कुरामा घरमा विवाद भइरहेको थियो ।
चारदिन अघि मात्र विदेशबाट घर आएका अशोक र आरतीबीच बहुविवाह गरेको कुरामा दैनिक विवाद हुने गरेको छिमेकीले बताएका छन् । दुई वर्षअघि सामाजिक परम्पराअनुसार विवाहित मृतकको सन्तान छैन्।
इलाका प्रहरी कार्यालय कल्याणपुरका अनुसार विषसेवनबाट गम्भीर बनेकी उनको उपचारका क्रममा सिरहाको लहानस्थित राउ स्मारक अस्पतालमा मृत्यु भएको हो । महिलाको शंकास्पद मृत्यु भएपछि बोदे बर्साइन नगपालिका ५ स्थित मृतकको माइत पक्षलाई खबर गरिएको छ ।
शंकास्पद मृत्यु भएपछि प्रहरीले मृतकका श्रीमान र ससुरालाई नियन्त्रणमा लिएर अनुसन्धान सुरु एसपी राजेन्द्र विष्टले जानकारी दिए । बहुविवाहको विवाद र झगडापछि आवेशमा विषसेवन गरेर आत्महत्या गरेको वा अन्य कसैले विषसेवन गराई हत्या गरेको विषयमा थप अनुसन्धान भइरहेको उनले बताए ।
यसअघि दसैंको टीकाकै दिन राजविराज नगरापलिका ६ स्थित जिल्ला प्रहरी कार्यालयसँगै जोडिएको घरमा एक्लै बस्दै आएकी ४५ वर्षीया आशादेवी देवको हत्या भएको थियो । सो घटनामा प्रहरीले देवकै साथी तथा छिमेकी चारजनालाई पक्राउ गरी गत सोमबार मात्र सार्वजनिक गरेको छ ।
प्रतिक्रिया दिनुहोस !
