बेनी : धवलागिरी गाउँपालिकाले स्थापना भएको २१ महिनापछि तोकिएको केन्द्रबाट नियमित सेवा प्रवाह सुरु गरेको छ ।
सदरमुकाम बेनीको इन्द्रेणी टोलमा कोठा भाडामा लिएर सञ्चालन गरिएको सम्पर्क कार्यालय बुधबार मुनामा सारिएको हो । अब गाउँपालिकाको सबै गतिविधि र सेवा प्रवाह मुनाबाट सञ्चालन हुने गाउँपालिका अध्यक्ष थमसरा पुनले बताइन् ।
२०७३ फागुनमा स्थानीय तह घोषणा हुने क्रममा केन्द्रको विवाद थियो । जनप्रतिनिधि चुनिएपछि २०७४ साउनमा भएको गाउँसभाले मुनाको घट्टेखोलामा स्थायी केन्द्र कायम गर्ने निर्णय गरेको थियो ।
‘बैंक, कर्मचारी र पूर्वाधारको अभावमा बेनीमा सम्पर्क कार्यालय राख्नुपर्ने बाध्यता थियो’, अध्यक्ष पुनले भनिन्, ‘सम्र्पक कार्यालय बन्द गरेर मुनामा आएका छौँ ।’ भौगोलिक रुपमा विकट र दुर्गम क्षेत्रमा अवस्थित ७ वटा वडा रहेको धवलागिरीका कर्मचारी र जनप्रतिनिधिहरु गाउँसभा, बैठक, तालिम, गोष्ठी, अनुगमन गर्नेबाहेकको अवस्थामा अधिकांश समय सदरमुकाम बेनीमै रहने गरेका थिए ।
गत असार अन्तिम साता ताकममा प्रभु बैंकले शाखा विस्तार गरेपछि शिक्षक, कर्मचारी, उपभोक्ता समितिको तलब भुक्तानी र आर्थिक कारोबार सहज भए पनि दरबन्दी अनुसारका कर्मचारी, इन्टरनेट, विद्युत लगायत समस्या रहेको प्रमुख प्रशासकीय अधिकृत अर्जुन शर्माले बताए ।
तत्काललाई ३ नम्बर वडाको भवनमा स्थापना गरिएको कार्यालयबाट सेवा चालु गरेको गाउँपालिकाले स्थायी पूर्वाधारको व्यवस्था गरेपछि घट्टेखोलामै सर्ने जनाएको छ । मुना र घट्टे खोला एउटै वडामा पर्छन् । २ बस्तीको दूरी करिब २ किलोमिटर मात्र अन्तर छ ।
गाउँपालिकाको लागि २२ रोपनी जग्गा खरिद र दानमार्फत प्राप्त भइसकेको छ । थप १० रोपनी जग्गा जुटाएर मापदण्ड पुरा गरी भवन निर्माणको काम अघि बढाउन प्रदेश र संघीय सरकारसँग पहल गरिएको उपाध्यक्ष रेशम छन्त्यालले बताए ।
गाउँमै कार्यालय स्थापना भएपछि बल्ल स्थानीय तहको महसुस गर्न पाउने स्थानीयबासीको अपेक्षा छ । कर्मचारी र अध्यक्ष, उपाध्यक्ष अधिकांश समय सदरमुकाममा बसेकोमा स्थानीयबासीले गुनासो गरेका थिए । ससानो कामका लागि पनि सदरमुकाम धाउनुपर्ने अवस्थाको अन्त्य भएको छ ।
यसअघि केन्द्र विवाद रहेको रघुगंगा गाउँपालिकाले पनि करिब १४ महिना सदरमुकाममा सञ्चालन गरेको सम्र्पक कार्यालय गत वैशाखमा स्थायी केन्द्र मौवाफाँट सारेको थियो । पाखापानी तोकिएको रघुगंगाको केन्द्र गाउँसभाबाट स्थानान्तरण गरिएको थियो ।
प्रतिक्रिया दिनुहोस !
