तौलिहवा : कपिलवस्तुको शुद्धोधन गाउँपालिका–४ मोतीघारीमा शुक्रबार राति स्थानीय नेता दीपेन्द्रकुमार चौधरी (राजाबाबु) को गोली प्रहार गरी हत्या भएको छ । दीपेन्द्रका भाइ जितेन्द्र र स्थानीय अजित पाण्डेबीच भएको झगडाका कारण पाण्डेले दाइको हत्या गरेको प्रहरीको भनाइ छ ।
राजाबाबुका भाइ जितेन्द्र शुक्रबार साँझ लवनीस्थित बजारमा सामान किन्न आएका थिए । सामान किन्दै गर्दा मादक पदार्थ सेवन गरेका पाण्डेसँग भनाभन भएको प्रत्यक्षदर्शीले बताएका छन् । स्थानीयले सम्झाइबुझाई झगडा मत्थर भएपछि जितेन्द्र घर लागेपछि पाण्डे केही सहयोगी लिएर चौधरीको घर गएका थिए । उता, जितेन्द्रका दाइ राजाबाबु राति एक्कै लवनी बजार आइरहेका थिए । बाटोमा पाण्डे समूहसँग जम्काभेट भएपछि उनीमाथि मोतीघारीमा अन्धाधुन्ध गोली प्रहार गरी हत्या गरेको प्रहरीले जनाएको छ ।
हत्या गरिएका राजाबाबुमाथि ६ राउन्ड गोली प्रहार भएको छ । ५ गोली टाउकामा लागेको छ । गोली प्रहारपछि राजाबाबुलाई लवनीस्थित स्थानीय मेडिकल हलमा उपचार गर्न लगिएको थियो । त्यहाँ उपचार सम्भव नभएपछि भैरहवास्थित मेडिकल कलेजमा लैजाँदै गर्दा बाटोमै मृत्यु भएको प्रहरीले जनाएको छ । घटनापछि पाण्डे फरार छन् ।
प्रहरीले पाण्डेका दुई दाजुभाइलाई अनुुसन्धान गर्न नियन्त्रणमा लिएको छ । पाण्डेको लवनी पेट्रोल पम्प छ । भाइसँगको सामान्य विषयलाई लिएर उनको हत्या भएको भन्दै स्थानीय आक्रोसित बनेका छन् । घटनाबारे अनुसन्धान भइरहेको जिल्ला प्रहरी कार्यालय कपिलवस्तुले जनाएको छ ।
हत्या गरिएका चौधरी प्रदेशसभा सदस्यको निर्वाचनमा स्वतन्त्र उम्मेदवार थिए । स्थानीय तहको चुनावमा उनी तत्कालीन फोरम लोकतान्त्रिकबाट शुद्धोधन गाउँपालिकाको प्रमुखमा उठेका थिए । फोरम लोकतान्त्रिक कांग्रेससँग मिलेपछि स्वतन्त्र रहेका चौधरी केही समयपहिले नेकपा प्रवेश गरेका हुन् ।
हत्या विरोधमा प्रदर्शन
चौधरीको हत्याको विरोधमा शनिबार लवनी बजारमा प्रदर्शन गरिएको छ । आक्रोशित समूह आगजनीमा उत्रिएपछि स्थिति तनावपूर्ण बनेको थियो । चौधरीको शव मेडिकल कलेज भैरहवाबाट लवनी ल्याएपछि वातावरण तनावग्रस्त बनेको हो । हत्यारालाई सार्वजनिक गर्न माग गर्दै समर्थकले नाराबाजी गरे । प्रदर्शनकारी र प्रहरीबीच झडप हुँदा एक जना घाइते भएका छन् । हत्यारालाई कारबाही नहुन्जेल आफन्तले शव नबुझ्ने बताएका छन् । हत्याराबारे प्रहरीलाई जानकारी भए पनि पक्राउ नगरेको भन्दै आफन्त तथा शुभचिन्तक आक्रोशित छन् ।
प्रतिक्रिया दिनुहोस !
