भारतीय राजदूतले मुख्यमन्त्रीलाई भने : विराटनगर एयरपोर्ट विस्तार गरौँ
पुष ४, २०७५ बुधबार १९:३:०
विराटनगर : नेपाल–भारत खुल्ला सीमाका ‘सम्भावना र चुनौती’ विषयक गोष्ठीमा विराटनगर आउन तयार भारतीय राजदूत मञ्जिवसिंह पुरीले काठमाडौँमा ४ घण्टासम्म उडान पर्खिए ।
विराटनगर एयरपोर्टको ‘भिजिबिलटी’ न्यून रहेको भन्दै उडान समयतालिका अनुसार भएको थिएन । नेपाल-भारत खुल्ला बोर्डर सम्भावना र चुनौती विषय गोष्ठीमा सहभागी हुन आएका प्रदेशभरका व्यवसायी लामो समयदेखि जहाज ‘ल्याण्ड’ हुने आशमा कुरिरहेका थिए ।
गोष्ठीमा आफ्नो बोल्ने पालो आएपछि पुरीले प्रदेश १ का मुख्यमन्त्री शेरधन राईतर्फ लक्षित गर्दै उनले भने, ‘कार्यक्रममा आउन ४ घण्टा कुर्नुपर्यो, विराटनगर एयरपोर्टको क्षमता त विस्तार गर्नुपर्ने देखियो ।’
पुरीले यसो भन्दा हलमा तालीको पर्रा छुट्यो । मुख्यमन्त्री राई प्रतिउत्तरमा मुस्कुराए तर पुरी यतिमै रोकिएनन् । उनले थपे, ‘आधुनिक संरचना बनिनसकेकै अवस्थामा पनि विराटनगर–पटना उडान भएको इतिहास छ, यसलाई तुरुन्त चालु गरेर कलकत्तासम्म लानु पर्यो, म कुटनीतिक पहल गर्न तयार छु ।’
पुरीले प्रदेश १ सम्भावनाको खानी रहेको औंल्याए । ‘प्रदेश १ यस्तो प्रदेश हो, जसले भारतका तीन प्रान्तसँग सहज ‘कनेक्टीभिटी’ छ’, उनले भने । भर्खरै भएको माउण्टेन फ्लाइटको स्मरण गर्दै पुरीले थपे, ‘यहाँका हिमालसम्मको सहज उडानका लागि पनि विराटनगर विमानस्थलको विस्तार अतिआवश्यक देखेको छु ।’
मुख्यमन्त्री राईले पुरीको भनाइलाई गम्भीररुपमा लिएको बताए । प्रदेश सरकारको योजना नै गरमाथाको ‘मेन गेट वे’ बनाउने रहेको जानकारी दिँदै त्यसका लागि सुविधायुक्त विमानस्थल आवश्यक रहेको तर्क गरे । ‘विराटनगर विमानस्थलबारे हामी मिहीनढंगले सोचिरहेका छौँ’, उनले भने, ‘यसलाई विस्तार गर्ने या अन्यत्र सार्नेबारे सरकार गृहकार्यमा छ ।’
प्रतिक्रिया दिनुहोस !
