विराटनगर : मोरङ र उदयपुरबाट लागुऔषध सहित एकै पटकमा प्रहरीले सातजनालाई पक्राउ गरेको छ । पक्राउ पर्नेहरु सबै ३६ वर्षभन्दा कम उमेरका छन् ।
मोरङको विराटनगर महानगरपालिका–१५ बाट एकजना र उदयपुरको चौदण्डीगढी नगरपालिका–३ कालीखोला किनारबाट ६ जनालाई प्रहरीले लागुऔषध सहित पक्राउ गरेको हो ।
विराटनगरबाट पक्राउ पर्ने १८ वर्षीय पप्पु मेहता सुनसरीको इटहरी उपमहानगरपालिका–८ का बासिन्दा हुन् । इलाका प्रहरी कार्यालय रानीका प्रहरी निरीक्षक ईन्द्रबहादुर रानाका अनुसार मेहताको साथबाट लुपिजेसिक नौ एम्पुल, फेनारगन नौ एम्पुल, एभिल नौ एम्पुल, डाईजेल्याब नौ एम्पुल र नाइट्रोसन १० चक्की बरामद भएको छ ।
भारतको जोगवनी बजारबाट लागुऔषध लिएर आउँदै गरेको अवस्थामा चेकजाँच गर्दा फेला परेपछि उनलाई पक्राउ गरिएको प्रहरीले जनाएको छ । मेहतालाई हिरासतमा राखेर अनुसन्धान अघि बढाइएको प्रहरीले जनाएको छ ।
उदयपुरको चौदण्डीगढीबा पक्राउ पर्ने ६ जनालाई भने खोला किनारमा शंकास्पद रुपमा बसिरहेको अवस्थामा प्रहरीले चेकजाँच गर्दा लागुऔषध भेटिएपछि पक्राउ गरेको हो । पक्राउ पर्नेमा उदयपुर बेलाका नगरपालिका–४ गुरुङचौरीका ३३ वर्षीय राजु कार्की, ३२ वर्षीय राजु राई, ३३ वर्षीय अर्जुन राई, २५ वर्षीय नवीन राई, चौडण्डीगढी–३ बसाहाका ३० वर्षीय मीनबहादुर मगर र सप्तरीको सप्तकोसी नगरपालिका–१ का ३६ वर्षीय मनोज मगर छन् ।
प्रदेश १ प्रहरी कार्यालय विराटनगरका अनुसार उदयपुरबाट खटिएको प्रहरी टोलीले चेकजाँच गर्दा उनीहरुको साथबाट लागुऔषध लुपिजेसिक आठ एम्पुल, फेनारगन आठ एम्पुल र डाईजेल्याब आठ एम्पुल बरामद भएको छ । पक्राउ परेकाहरुमाथि प्रहरीले अनुसन्धान गरिरहेको बताएको छ ।
प्रतिक्रिया दिनुहोस !
