सुनसरीमा दुई समूहबीच झडप : प्रहरीको गोली लागेर १ जनाको मृत्यु, १० जना घाइते

सुनसरी : सुनसरीको देवानगञ्ज गाउँपालिका–३ मा आइतबार राति दुई समूहबीच भएको झडपमा प्रहरीको गोली लागेर एक युवकको मृत्यु भएको छ। मृत्यु हुनेमा देवानगञ्ज–३ का २४ वर्षीय ओमप्रकाश मेहता रहेका छन्।

साउने सोमबारको ब्रतका लागि हिन्दू धर्मावलम्बीहरूले निकाल्ने बोलबम यात्रामा सहभागी एक समूहलाई आइतबार राती अर्को समूहले आक्रमण गरेपछि झडप सुरु भएको बताइएको छ। झडपले उग्ररूप लिएपछि स्थानीयका घर तथा पसलमा समेत आगजनी गरिएको थियो।

घटनाको जानकारी पाएलगत्तै नेपाल प्रहरी र सशस्त्र प्रहरी परिचालन गरिएको थियो। स्थिति नियन्त्रणमा लिने क्रममा प्रहरीले गोली चलाउँदा मेहताको गोली लागेर मृत्यु भएको बताइएको छ। घटनामा गोली लागेर तथा झडपका क्रममा करिब १० जना घाइते भएको प्रहरीले जनाइएको छ।

जिल्ला प्रहरी कार्यालय सुनसरीका प्रहरी निरीक्षक प्रकाश पराजुलीका अनुसार झडप नियन्त्रणमा लिने क्रममा पाँच जना प्रहरीसमेत घाइते भएका छन्। घाइतेहरूको विराटनगरस्थित विराट टिचिङ, नोबेल र न्युरो अस्पतालमा उपचार भइरहेको छ। घटनापछि जिल्लाका विभिन्न स्थानबाट थप नेपाल प्रहरी र सशस्त्र प्रहरी परिचालन गरी सुरक्षा व्यवस्था कडा पारिएको छ। प्रहरी निरीक्षक पराजुलीले घटनास्थलको अवस्था अहिले सामान्य रहेको बताएका छन्।

यसैबीच, सुनसरी क्षेत्र नम्बर- २ बाट निर्वाचित प्रतिनिधिसभा सदस्य लालविक्रम थापाले प्रहरीले गोली चलाएर नागरिकको ज्यान गएको घटनाप्रति विरोध जनाएका छन्। उनले घटनाको निष्पक्ष छानबिन गरी दोषीमाथि कानुनी कारबाही गरिने बताएका छन्।