बिर्तामोड : झापाको हल्दिबारी गाउँपालिकामा माघ २२ देखि प्रदेशस्तरीय पुरुष नकआउट भलिबल प्रतियोगिता हुने भएको छ। हल्दिबारी गाउँपालिका, वडा र स्थानीय पाथिभरा कालिका सामुदायिक वन उपभोक्ता समितिको सहयोगमा दीपज्योती युवा परिवारले महोत्सव सहित प्रदेश स्तरीय भलिबल खेलको आयोजना गर्ने लागेको हो।
पाँच दिनसम्म चल्ने सो भलिबल प्रतियोगितामा प्रदेश १ का ख्यातिप्राप्त टिम नेपाल पुलिस, एपीएफ र आर्मी क्लब सहित झापा, मोरङ, इलाम, भोजपुर, ताप्लेजुङ, संखुवासभा र आयोजक टिमको सहभागिता रहने आयोजकका सचिव नवीन मैनालीले बताए।
भलिबल प्रतियोगितासँगै हल्दिबारीमा महोत्सव पनि सुरु हुने र महोत्सव भने फागुन ५ गते सम्म सञ्चालन हुने सचिव मैनालीको भनाई छ।
भलिबल खेल र महोत्सवको एकैसाथ प्रदेश १ का आन्तरिक मामिला तथा कानुनमन्त्री हिक्मत कार्कीले उद्घाटन गर्ने कार्यक्रम तय भएको छ। प्रतियोगिताको विजयी टिमले नगद १ लाख ५ हजार, उपविजेताले नगद ५१ हजार सहित ट्रफी मेडल र प्रमाणपत्र प्राप्त गर्ने आयोजकले जनाएको छ।
यस्तै बेस्ट स्ट्राइकर, बेस्ट सटर, लिब्रो, ब्लकर, सर्भरले पनि क्रमशः नगद २/२ हजार सहित ट्रफी र प्रमाणपत्र प्राप्त गर्नेछन् भने फेयर अफ द टुर्नामेन्टले नगद ५ हजारसहित ट्रफी र प्रमाणपत्र प्राप्त गर्ने आयोजक क्लबका अध्यक्ष पवन चुडालले बताए।
खेल अवधिभर प्रत्येक दिन म्यानअफ द म्याचलाई नगद ५ सय सहित मेडल र प्रमाणपत्र प्रदान वितरण गरिने छ।
प्रतिक्रिया दिनुहोस !
