रामेछाप सिभिल च्याम्पियनसिप : प्रदेश नं १, गण्डकी, नमूनादीप र शान्तिदीप समूह विजेता
माघ २४, २०७५ बिहीबार ७:४५:०
काठमाडौं : मन्थलीमा जारी रामेछाप सिभिल च्याम्पियनसिप तथा चौथो रामेछाप पुरुष भलिबलको लिग चरणका खेल सकिएका छन्। जिल्ला खेलकुद विकास समिति रामेछापले आयोजनामा भएको भलिबल प्रतियोगिताको बुधबार लिग चरणका खेल सकिएका हुन् ।
च्याम्पियनसिपमा प्रदेश नं १, गण्डकी प्रदेश, नमूना दीप युवा क्लब रामेछाप र शान्तिदीप युवा क्लब रामेछाप समुह विजेता हुँदै क्वाटरफाइनलमा प्रवेश गरेका छन् । बुधबार भएको समुह 'क' अन्तरगतको प्रदेश नम्बर ३ र गण्डकी प्रदेशबीच भएको पहिलो खेलमा गण्डकी प्रदेशले प्रदेश नम्बर ३ लाई २६–२४,२५–९,२५–१९ अंकको सोझो (३-०) सेटले पराजित गर्यो ।
समूह 'ग' अन्तरगतको प्रदेश नम्बर २ र नमुना दीप युवा क्लब रामेछापबीच भएको दोस्रो खेलमा नमुनादीपले प्रदेश नम्बर २ लाई २५–१९,२५–२३,२५–१२ अंकको सोझो (३-०) सेटले पराजित गर्यो ।
त्यसैगरी समूह 'घ' अन्तरगतको शान्तिदीप युवा क्लब रामेछाप र प्याराडाइज युवा क्लब रामेछापबीच भएको तेस्रो खेलमा शान्तिदीपले प्याराडाइजलाई २५–१९,२५–१८,२५–१७ अंकको सोझो (३-०) सेटले पराजित गर्यो ।
यस्तै समूह 'क' अन्तरगतकै सुदूरपश्चिम र गण्डकी प्रदेश भलिबल संघबीच भएको चौथो खेलमा गण्डकी प्रदेशले सुदूरपश्चिमलाई २५–१८,२५–२०,२५–१९ अंकको सोझो (३-०) सेटले पराजित गर्यो ।पराजित भएसँगै अघिल्लो सालको विजेता सुदूरपश्चिम भलिबल संघ प्रतियोगिताबाटै बाहिरिएको छ।
मंगलबार भएको समूह 'ख' अन्तरगतको प्रदेश नम्बर १ र कर्णाली प्रदेशबीच भएको खेलमा प्रदेश नम्बर १ ले कर्णाली प्रदेशलाई २५–१८, २५–२१, २५–२२ १९ अंकको सोझो (३-०) सेटले पराजित गरेको थियो।
क्वाटर फाइनलका खेल बिहीबार बिहानबाट हुने जिल्ला खेलकुद विकास समिति रामेछापका अध्यक्ष पुरुषोत्तम कडेरियाले जानकारी दिए। उनका अनुसार क्वाटर फाइनल खेलमा गण्डकी प्रदेश र दुई नम्बर प्रदेश, एक नम्बर प्रदेश र प्याराडाइज युवा क्लब, नमुनादीप युवा क्लब र तीन नम्बर प्रदेश, शान्ति दीप युवा क्लब र कर्णाली प्रदेशबीच प्रतिष्पर्धा हुनेछ ।
शनिबार सम्पन्न हुने रामेछाप सिभिल च्याम्पियनसिपमा प्रथम, द्वितीय, तृतीय र सान्तवना हुने टीमले शिल्डसहित क्रमश : तीन लाख, दुई लाख, एक लाख र ५० हजार प्राप्त गर्ने छन्।
प्रतिक्रिया दिनुहोस !
