राजविराज : अपहरणमा परेको भनिएका यहाँको तिलाठी कोइलाडी गाउँपालिका–७ का २२ वर्षीय शिवदत्त मण्डलविरुद्ध आइतबार जबरजस्ती करणीको उजुरी दर्ता भएको छ ।
प्रहरीले बाँधिएर राखिएका मण्डललाई गएराति उद्धार गर्यो त्यसपछि अपहरणकारी भनिएका दुईजना गिरफ्तार पनि भए । तर बाँधेर राख्नु पर्ने कारण खुलेपछि उनै अपहरणमा परेका भनिएका मण्डलविरुद्ध जबरजस्ती करणीको उजुरी दर्ता गर्नुपरेको जिल्ला प्रहरी कार्यालयका डिएसपी भावेश रिमालले बताए ।
एक २० वर्षीया युवतीमाथि बलात्कार गरेर फरार हुने क्रममा पीडितका परिवारले मण्डललाई नियन्त्रणमा लिएर रातभर डोरीले बाँधेर राखेका थिए । आरोपितका बुवाले आफ्नो छोरालाई बन्धक बनाएको भन्दै पीडित परिवारका सदस्यविरुद्ध जिल्ला प्रहरी कार्यालयमा अपहरण तथा शरीर बन्धकको उजुरी गरे ।
प्रहरीले बाँधिएर राखिएका मण्डललाई उद्दार गर्नुका साथै पीडितका काका र दाजुलाई नियन्त्रणमा लिएर प्रहरी कार्यालयमा दिनभरी थुन्यो ।
यसैबीच बलात्कृत किशोरी स्वास्थ्य जाँचका लागि राजविराजस्थित अञ्चल अस्पताल आइन् । अस्पताल आएकी उनलाई अस्पतालमा खटिएका प्रहरी र कर्मचारीले पहिले प्रहरीमा उजुरी गर्न र प्रहरी कार्यालयको सिफारिसमा स्वास्थ्य जाँचका लागि अस्पताल आउन सल्लाह दिए ।
अस्पताल बिटका प्रहरी हवल्दार रामशंकर यादवका साथ पीडित जिल्ला प्रहरी कार्यालयमा पुग्दा आरोपित र उनका आफन्तहरु प्रहरी कार्यालय परिसरमा घुमिरहेका थिए भने उनका काका र दाजु प्रहरी हिरासतमा थिए ।
पीडितले घटनाबारे जानकारी गराएपछि आरोपितलाई प्रहरीले नियन्त्रणमा लियो । त्यसपछि पीडितका काका र दाजुलाई रिहा गर्यो । पीडितका दाजुका अनुसार फागुन ७ गते पीडित किशोरीको विवाह पक्का भइ तिलक (दाइजो) स्वरुप केटा पक्षलाई चार लाख रुपैयाँ दिइसकिएको छ ।
स्वास्थ्य परीक्षणका लागि गएराति अस्पताल लगिएका आरोपितले अस्पतालमा घटना स्वीकार्दै किशोरी राजी भइ आफू विवाह गर्न तयार भएको बताएका छन् ।
यता पीडितकी आमाले दिएको उजुरी दर्ता भई आवश्यक कारवाही प्रकृया चलिसकेकाले कानुनबमोजिम नै कारवाही हुने र अदालतले फैसला गर्ने डिएसपी रिमालले बताए ।
प्रतिक्रिया दिनुहोस !
