नेपाली महिलालाई बलात्कार गर्ने भारतीयलाई पाँच वर्ष कैद

राजविराज : दशगजा सीमाक्षेत्र नजिकै घर भएकी ३५ वर्षीया महिलालाई बलात्कार गरेको कसुरमा अदालतले एक भारतीय नागरिकलाई पाँच वर्ष कैद सजाय सुनाएको छ ।

४५ वर्षीय बरतलाल पोद्दारले नेपाली महिलालाई ‘ब्ल्याकमेलिङ’ गर्दै बलात्कार गरेको कसुरमा अदालतले पाँच वर्ष कैद सजायको फैसला गरेको हो । जिल्ला न्यायाधीश श्रीप्रसाद सञ्जेलको इजलाशले भारत बिहारस्थित मधुबनी राज्य धर्मपुर–५ का ४५ वर्षीय भरतलाल भनिने बरतलाल पोद्दारलाई बिहीबार पाँच वर्षको कैद सजाय सुनाएको हो ।

घटनास्थलबाट गाउँलेहरुले नियन्त्रणमा लिई प्रहरीलाई जिम्मा लगाएको र पीडित तथा तत्काल घटनास्थलमा उपस्थित व्यक्तिहरुले गरेको बयानलगायत आधारमा आरोपितले बलात्कार गरेको पुष्टि भएकोले कैद सजायको फैसला गरिएको न्यायाधीश सञ्जेलले बताए ।

पीडितले गुहार मागेपछि जम्मा भएका गाउँलेहरूले आरोपितलाई २०७४ कात्तिक १५ गते राति नियन्त्रणमा लिई कुटपिट गर्दै प्रहरीको जिम्मा लगाएका थिए । पीडितले इलाका प्रहरी कार्यालय कल्याणपुरमा उजुरी दर्ता गराएकी थिइन् । प्रहरीका अनुसार गाऊँलेहरुको कुटाईबाट घाइते भएका आरोपितको सिरहाको लहानस्थित रामकुमार उमाप्रसाद स्मारक अस्पतालमा उपचार समेत भएको थियो ।

१० वर्षअघि श्रीमानको मृत्यु भएपछि दुई छोराको पालनपालन गर्दैआएकी ती महिलाको एक छोरा वैदेशिक रोजगारमा छन् । दशगजा सीमा नजिकै घर भएकाले अभियुक्तले डर, त्रास देखाई बलात्कार गरेको र गुहार मागेपछि जम्मा भएका गाउँलेले उनलाई नियन्त्रणमा लिई कारवाहीका लागि प्रहरीमा बुझाएको पीडितले बताइन् । जिल्ला अदालतको आदेशमा अभियुक्त पुर्पक्षका लागि २०७४ मंसिर १३ गतेदेखि राजविराज कारागारमा थुनामा छन् ।