राजविराजमा प्रदेशस्तरीय क्रिकेट, धनुषा र पर्साको विजयी सुरुवात
फागुन ११, २०७५ शनिबार २०:४:०
राजविराज : राजविराजमा शनिबारदेखि सुरु भएको २ नम्बर प्रदेशस्तरीय क्रिकेट प्रतियोगितामा धनुषा र पर्साले विजयी सुरुवात गरेका छन् ।
उद्घाटन खेलमा धनुषाले बारालाई ४ विकेटले र पर्साले महोत्तरीलाई १३ रनले पराजित गर्दै विजयी सुरुवात गरेका हुन् । प्रतियोगिता संयोजक रबी रायका अनुसार उद्घाटन खेलका म्यान अफ दि म्याच धनुषाका विशाल सुशलिंगले कसिलो बलिङ गर्दै महत्वपूर्ण ४ विकेट लिएपछि बारा १९ ओभर २ बलमा सम्पूर्ण विकेट गुमाइ १ सय १३ रनमा समेटिएको थियो । सुशलिंगले ४ ओभरमा ४ विकेट लिँदा ११ रन मात्र खर्चे ।
बाराका रवीकुमार साहले ५२ बलमा ५ चौकाको मद्दतले आर्कषक ५० तथा तिर्थराज दासले २१ रनको योगदान दिए । अन्य खेलाडीले दोहोरो अंक बनाउन सकेनन् । धनुषाका हरिशंकर साहले २६, कुनैन साहले २४, आयुष ठाकुरले २०, अन्सरुल रैनले १० तथा परशुराम यादवले नटआउट हुँदै १५ रनको योगदान दिएपछि ६ विकेटको नोक्सानीमा १५ ओभर एक बलमा सहजै लक्ष्य भेटायो ।
पहिलो दिनको दोस्रो खेलमा महोत्तरीका राहुलप्रताप सिंहले नट आउट रही ४२ बलमा ४ चौका र ४ छक्काको मद्दतले ५७ रन जोडे पनि जितका लागि पर्याप्त हुन सकेन । महोत्तरीले ५ बिकेटको नोक्सानीमा १ सय ३२ रन मात्र जोड्न सकेपछि १३ रनले पराजिय भोग्नु पर्याे ।
त्यसअघि पर्साले निर्धारित २० ओभरको खेलमा ५ विकेटको नोक्सानीमा १ सय ४५ रनको योगफल बनाएको थियो । जसमा म्यान अफ दि म्याच बनेका कञ्चनजंग कार्कीले ४४ र हासिम अंसारीले ४० रन बटुल्दै पहिलो विकेटका लागि ८५ रन जोडे ।
अन्य ब्याट्सम्यानमा सुरज कुर्मीले नटआउट रही १८ तथा सोनु अंसारीले १५ रनको योगदान दिए । बलिंङतर्फ महोत्तरीका बादलकुमार गुप्ताले २ तथा रितेश सिंह र राहुलप्रताप सिंहले समान १ विकेट लिए ।
आठाैं राष्ट्रिय खेलकुद २०७५ मा २ नम्बर प्रदेशबाट सहभागिता जनाउने खेलाडी छनोटका लागि आयोजना गरिएको प्रतियोगिताको शनिबार एक समारोहका बीच मनमोहन मेमोरियल क्रिकेट सेन्टरका अध्यक्ष ठाकुर गैरेले उद्घाटन गरे ।
मध्यमाञ्चल क्षेत्रीय खेलकुद विकास समिति र सप्तरी जिल्ला खेलकुद विकास समितिको आयोजनामा सुरु भएको प्रतियोगिता एक सातासम्म सञ्चालन चल्ने बताइएको छ ।
प्रतिक्रिया दिनुहोस !
