मोटरसाइकल जुध्दा सडकमा लडे, बसको ठक्करले ज्यान गयो
भक्तपुर : मध्यपुर थिमी नगरपालिका २ सानोठिमीमा बिहीबार दुई मोटरसाइकलको ठोक्किएर लडेको एउटा मोटरसाइकललाई बसले पुनः ठक्कर दिँदा एकजनाको मृत्यु भएको छ ।
महानगरीय प्रहरी परिसर भक्तपुरका अनुसार सुरुमा काठमाडौंको पेप्सीकोलाबाट सानोठिमीतर्फ आउँदै गरेको बा ७४ प ५५३ नम्बरको मोटरसाइकलले सानोठिमीबाट काठमाडौंतर्फ जाँदै गरेको प्रदेश ३–०२–००२ प ६३ नम्बरको मोटरसाइकललाई ठक्कर दिएको थियो । ठक्करबाट प्रदेश ३–०२–००२ प ६३ नम्बरको मोटसाइकल सडकमा लडेको थियो ।
लडेको मोटरसाइकललाई पछाडि आइरहेको बा २ ख ४८६८ नम्बरको बसलेसमेत ठक्कर दिएको थियो । मोटरसाइकल र बसको ठक्करबाट मोटरसाइकल चालक काभ्रेको देउपुर ३ घर भई हाल मध्यपुर थिमी नपा ९ बोडे बस्ने २४ वर्षीय सन्तोष राई घाइते भएको भक्तपुर प्रहरीले जनाएको छ ।
घाइते भएका राईलाई तत्काल उपचारको लागि मध्यपुर थिमीकै गट्ठाघरस्थित नागरिक सामुदायिक अस्पताल लगिएको थियो । अस्पतालमा उपचारकै क्रममा बिहीबार उनको मृत्यु भएको भक्तपुर प्रहरीका निमित्त प्रवक्ता प्रहरी निरीक्षक सुशीलकुमार पाण्डेले जानकारी दिए ।
उनले घटनामा संलग्न बा ७४ प ५३३ नम्बरको मोटरसाइकल चालक काठमाडौंको पेप्सिकोला बस्ने २४ वर्षीय अरुणकुमार श्रेष्ठ र बस चालक सिन्धुपाल्चोक बलेफी गाउँपालिका ३ घर भई हाल पुरानो ठिमी बस्ने २४ वर्षीय ताराबहादुर तामाङलाई महानगरीय प्रहरी वृत्त ठिमीको नियन्त्रणमा राखिएको बताए ।उनका अनुसार घटनाबारे अनुसन्धान भइरहेको छ ।