दोलखा : प्रसिद्ध तीर्थस्थल कालिञ्चोकको भेटी संकलनको जिम्मा पाएका ठेकेदारले डेढ वर्षदेखि नबुझाएको पाइएको छ । मन्दिरलाई व्यवस्थापन गर्न २०७३ सालदेखि सुरु गरिएको कालिञ्चोक मन्दिरको भेटी संकलनको ठेक्का लिएका ठेकेदारले १८ महिनादेखि मालपोत कार्यालयमा नबुझाएको पाइएको हो ।
भक्तजनहरुले आस्था र स्वेच्छिक दान गरेको भेटी संकलन गर्ने ठेक्का लिएका कालिञ्चोक गाउँपालिका–१, कालिञ्चोकका ठेकेदार डम्बरबहादुर तामाङले १८ महिनादेखि भेटीको रकम नबुझाएको मालपोत कार्यालय दोलखाले जनाएको छ । ठेकेदार तामाङ कालिञ्चोक गाउँपालिका–१, कालिञ्चोकबाट निर्वाचित वडासदस्य पनि हुन् ।
ठेकेदार तामाङले २०७३ भदौ ३० गते मालपोत कार्यालयमा वार्षिक ४ लाख एकहजार एकसय १५ भेटी बुझाउने गरी सम्झौता गरेको थिए ।
गत आर्थिक बर्षदेखिको भेटी नबुझाएको दोलखाको प्रमुख मालपोत अधिृकत गोविन्दप्रसाद अधिकारीले जानकारी दिए । २०७५ भदौ २८ गतेदेखि नयाँ ठेकेदारसँग भेटी संकलनका लागि सम्झौता भईसकेको भए पनि ठेकेदार तामाङले भेटी बुझाएका छैनन् ।
रकम दाखिला गर्न र नयाँ ठेकेदारलाई तालाचाबी बुझाउन पटकपटक ताकेता गर्दा समेत अटेर गरी तामाङले नै भेटी संकलन गरेको कार्यालय प्रमुख अधिकारी बताउँछन् ।
ठेकेदार तामाङले गत आर्थिक वर्षको ४ लाख एकहजार एकसय १५ र चालु आवको ६ महिनाको दामासाहीले हुने २ लाख एकहजार गरी ६ लाख दुईहजार भेटी बुझाउन बाँकी रहेको कार्यालयले तथ्याङ्क राखेको छ ।
भेटी नबुझाएकोबारे सोध्दा ठेकेदार तामाङले आफैँले नपाएको बताए । ‘मैलै नै पाएको छैन, कसरी बुझाउनु’, उनले भने, ‘२०७३ सालको बुझाएको छु ७४ सालको बाँकी छ’ उनले भने ।
दोलखाका प्रमुख जिल्ला अधिकारी सागरमणी पाठकले भेटी असुलिने बताए । ‘असुल हुन्छ’, उनले भने, ‘सम्झौताबमोजिमको भेटी नबुझाए सरकारी बाँकी सरह घरघरानाबाट भए पनि असुल्छौँ ।’
प्रतिक्रिया दिनुहोस !
