विद्यार्थीको आन्दोलनले जीतपुरमा दिनभर तनाव
बारा : दुई नम्बर प्रदेशमा स्थगित भएको एसईई परिक्षाको विषयलाई लिएर शनिबार दिनभर बाराको जीतपुर तनावग्रस्त बन्यो ।
परिक्षा स्थगित भएको विरोधमा सडकमा उत्रिएर आक्रोश पोखेका विद्यार्थी र प्रहरीबीचको झडपले जीतपुरसिमरा उपमहानगरपालिकाको जीतपुर बजार करिब ६ घण्टा तनावग्रस्त बनेको थियो ।
प्रश्नपत्र बाहिरिनु र परीक्षा स्थगित हुनुमा सरकार दोषी रहेको भन्दै विद्यार्थीले जीतपुरस्थित सडकमा बिहानैदेखि यातायात अवरुद्ध पार्दै प्रदर्शन थालेका थिए । सडकमा उत्रिएका विद्यार्थीलाई हटाउन प्रहरीले बल प्रयोग गरेपछि स्थिति तनावपूर्ण बनेको हो ।
प्रहरीले यातायात खुलाउने क्रममा बल प्रयोग गरेको भन्दै आक्रोशित विद्यार्थीले प्रहरीमाथि ढुंगा प्रहार गरेपछि दोहारो झडप भएको हो । विद्यार्थी र प्रहरीबीचको झडप नियन्त्रणमा आउन करिब ६ लागेको थियो । झडपका क्रममा विद्यार्थी र प्रहरी दुबैतर्फ दर्जनौँ भन्दा बढी घाइते भए । घाइतेमध्ये विद्यार्थी रमिता चौधरी, स्थानीय हरिशंकर गुप्तालगायतलाई स्थानीय स्वास्थ्य क्लिनिकमा उपचार हुन नसकेपछि थप उपचारका लागि वीरगन्ज लगिएको छ ।
झडपमा प्रहरीतर्फ आठ जना घाइते भएका छन् । घाइतेमध्ये प्रहरी जवान ललनदेव यादव, एके सिंह, निरु श्रेष्ठलगायत स्थानीय अस्पतालमा उपचार भइरहेको छ । झडप नियन्त्रण भन्दा बाहिर गएपछि प्रहरीले दर्जनौको संख्यामा हवाई फायर र अश्रुग्यास प्रहार गरेको थियो । प्रहरीले अनावश्यक बल प्रयोग गरेको भन्दै विद्यार्थीको आन्दोलनमा स्थानीयबासिन्दा समेत सहभागी थिए ।
आक्रोशित विद्यार्थीले सशस्त्र प्रहरीको ना १ झ ७१२ नम्बरको जिपमा तोडफोड र आगजनी गरेका छन् । आगजनीबाट गाडीको पछिल्लो भाग पूर्ण रुपमा जलेको छ भने अघिल्लो भागको सीसा फुटेको छ । यस्तै विद्यार्थीले ईलाका प्रहरी कार्यालयको बा २ प ७५२४ नम्बरको मोटरसाइकलमा पनि आगजनी गरे । प्रहरीले आठजनालाई नियन्त्रणमा लिएको छ ।