दाङ : पूर्वएसएसपी गोवद्र्धन श्रेष्ठ ६७ वर्षका भए । उनी आठाैं राष्ट्रिय खेलकुदमा टेबुलटेनिसका प्रतियोगी हुन् । प्रहरी सेवामा लामो समय काम गरेका श्रेष्ठ अहिले पनि त्यत्तिकै जाँगरिला र फुर्तिला छन् ।
नेपाल पुलिस क्लबको तर्फबाट आठौंमा प्रतियोगीको रूपमा नाति पुस्तासँग उनले पनि भाग लिएका छन् । बुधबारदेखि दाङको घोराहीमा सुरु भएको टेबुलटेनिसमा उनी प्रतिस्पर्धीको रूपमा सहभागी मात्रै भएका छैनन् फरक रूपमा आफूलाई चिनाएका छन् । उनीसँगै उनकी आठ वर्षीया नातिनी शुभ श्री श्रेष्ठ पनि प्रतियोगी बनेकी छन् । १४ वर्ष उमेरसमूहसम्ममा प्रतियोगीहरूलाई पछि पारेकी शुभ श्री प्रतियोगिताको सबैभन्दा कान्छो उमेरकी सहभागी पनि हुन् ।
शुभ श्री ६ वर्षदेखि नै टेबुलटेनिस खेल्दै आएकी छन् । प्रतियोगितामा सबैभन्दा बढी उमेर र कम उमेरका खेलाडी एउटै घरमा छन् । परिवारमा श्रेष्ठका छोरा, छोरी, नातिनी सबै टेबुलटेनिसकै खेलाडी रहेको उनले सुनाए । ‘छोरी र म त अन्तर्राष्ट्रिय स्तरकै प्रतियोगितामा सहभागी भएका छौं’ श्रेष्ठले भने, ‘अब नातिनीको पनि खेलप्रति चासो बढेको छ ।’ पूर्वएसएसपी श्रेष्ठले युवा पुस्तालाई खेलप्रति आकर्षण गर्न पनि आफूले टेबुलटेनिसलाई महŒव दिएको बताए । उनले भने, ‘कम उमेरका छोरा नातिसँग खेल्दा धेरै नै आनन्द आउँदो रहेछ । खेलप्रति विश्वास र लगाव सबैमा हुनुपर्छ ।’
सन १९८३ देखि ८६ सम्मका सबै प्रतियोगितामा टेबुलटेनिसतर्फ च्याम्पियन भनेको बताए । आफूसँगै उनले प्रतियोगितामा नाति पुस्ता पनि सहभागी गराउँदा प्रतियोगिताको रोमाञ्च बढेको दाङ जिल्ला टेबुलटेनिस संघका अध्यक्ष सीताराम शर्मा आचार्यले बताए । ‘उहाँबाट हामीले धेरै सिक्नुपर्छ’, उनले भने, ‘यो उमेरमा प्रतियोगितामा भाग लिने व्यक्ति हाम्रा लागि देवतै हुन् ।’
कम उमेरकी सहभागी शुभ श्रीले बुवा र बाजेको खेल प्रेमले आफू प्रतियोगितामा सहभागी भएको बताइन् । उनले घरमा बुवा र बाजेले टेबुलटेनिस सिकाउने गरेको भन्दै सहभागी भएकोमा धेरै खुसी रहेको बताइन् । बुधबारदेखि दाङमा सुरु भएको टेबुलटेनिस खेलमा बाजे नाति पुस्ता प्रतियोगितामा देखिएपछि प्रतियोगितामा फरक ऊर्जा आएको खेलकुद विकास समितिका अध्यक्ष डिल्ली डाँगीले बताए । प्रतियोगिताको पूर्व युवा तथा खेलकुदमन्त्री दलजित श्रीपालीले उद्घाटन गरे ।
प्रतिक्रिया दिनुहोस !
