विराटनगर : मोरङ र भोजपुरमा भएको दुर्घटनामा दुई जनाको मृत्यु भएको छ। मोरङको बुढीमगंगा गाउँपालिका–३ मा ना २ ख ५३५२ नम्बरको ट्रकको ठक्करबाट ना ४६ प २५८५ नम्बरको मोटरसाइकलका चालक सुनसरीको गढी गाउँपालिका–२ का २५ वर्षीय सन्तोश साहको मृत्यु भएको हो।
कोसी राजमार्गमा दक्षिणबाट उत्तरतर्फ जाँदै गरेको मोटरसाइकललाई बिहीबार साँझ ७ बजे पछाडिबाट ट्रकले ठक्कर दिएको थियो। घाइते साहको उपचारका क्रममा शुक्रबार विराट टिचिङ अस्पतालमा मृत्यु भएको प्रहरीले जनाएको छ। प्रहरीकाअनुसार ठक्कर दिने ट्रक र चालक सुनसरीको रामधुनी गाउँपालिका–१ का ३० वर्षीय दिपेन विकलाई नियन्त्रणमा लिएर घटनाको अनुसन्धान थालिएको छ।
त्यस्तै भोजपुरको हतुवागढी गाउँपालिका–९ मा ट्रयाक्टर दुर्घटना हुँदा ३५ वर्षीय शान्ति मगरको मृत्यु भएको छ। दाउरा लोड गरेर सापिङटारबाट ज्यामिरेतर्फ जाँदै गरेको को २ त ८७१४ नम्बरको ट्रयाक्टर आफैं अनियन्त्रित भई बिहीबार साँझ साढे ७ बजे सडकबाट अन्दाजी ३५ मिटर तल खसेर दुर्घटना भएको हो।
प्रदेश १ प्रहरी कार्यालय विराटनगरका प्रवक्ता डीएसपी सिद्ध न्यौपानेकाअनुसार दुर्घटनामा परेर मगरको घटनास्थलमै मृत्यु भएको हो। ट्रयाक्टर र चालक ३६ वर्षीय मेघराज राईलाई नियन्त्रणमा लिइएको उनले जानकारी दिए।
प्रतिक्रिया दिनुहोस !
