‘शिवजीको प्रसाद’ दिँदै बेहोस बनाएर लुटपाट गर्ने दुईजना पक्राउ

विराटनगर : मोरङको लेटाङ नगरपालिका–५ स्थित बेहोस बनाएर एक महिलामाथि लुटपाट गरेको घटनामा संलग्न दुईजनालाई प्रहरीले १० महिनापछि पक्राउ गरेको छ ।

पक्राउ पर्नेमा सुनसरीको इटहरी उपमहानगरपालिका–१७ की २५ वर्षीया हजरा खातुन र २९ वर्षीय महमद अली रहेको मोरङ प्रहरीका प्रवक्ता डिएसपी घनश्याम श्रेष्ठले बताए ।

उनका अनुसार दुबैजना २०७५ असार १७ गते साँझ पानी परिहरको बेला लेटाङ–५ की ३९ वर्षीया सुनिता लिम्बूको घरमा ओत लाग्न भनी आएका थिए । त्यसपछि सुनिताकै मोबाइल मागेर विभिन्न ठाउँमा फोन गर्दै आफूहरुसँग साथमा ५ लाख रुपैयाँ रहेकोले उक्त रकम राखिदिनु समेत भनेका थिए ।

त्यस क्रममा सुनिता र पति ४५ वर्षीय प्रेम लिम्बूलाई ‘शिवजीको प्रसाद’ भनेर यसले फलिफाप गर्ने दावी गर्दै रातो टीका लगाइदिएको प्रहरी अनुसन्धानमा खुलेको छ । डिएसपी श्रेष्ठका अनुसार उक्त टीका लगाइदिएपछि नै लिम्बू दम्पति बेहोस बनेका थिए । बेहोस बनेपछि सुनिताले लगाएको सुनको सिक्री, कानमा लगाउने पिंजडा, सुनको बाला, ५ हजार नगद, कपडा समेत गरेर दुई लाख भन्दा बढी लुटपाट गरेर दुबैजना त्यहाँबाट फरार बनेका थिए ।

सोही घटनाको लामो अनुसन्धानपछि वास्तविकता पत्ता लागेको जानकारी श्रेष्ठले दिए । घटनामा संलग्न दुबैजनालाई विराटनगर महानगरपालिका–४ बरगाछीबाट पक्राउ गरिएको प्रहरीले जनाएको छ ।

दुबैजना विरुद्ध मुलुकी फौजदारी कार्यविधी (संहिता) ऐन २०७४ बमोजिम अदालतबाट शुक्रबार म्याद थप गरेर अनुसन्धान थालिएको जानकारी डिएसपी श्रेष्ठले दिए ।