विराटनगर, उदयपुर : प्रदेश १ का दुई जिल्ला मोरङ र उदयपुरमा शुक्रबार राति भएका सवारी दुर्घटनामा परेर दुईजनाको मृत्यु भएको छ।
मोरङको सुन्दरहरैंचा नगरपालिका–३ त्रियुगा चोकमा दक्षिणबाट उत्तरतर्फ जाँदै गरेको को २६ प ३०९९ नम्बरको मोटरसाइकल शुक्रबार बेलुका ७ बजे आफैँ अनियन्त्रित भइ दुर्घटनामा परेको थियो। दुर्घटनामा मोटरसाइकल चालक स्थानीय ३५ वर्षीय धनकुमार राईको मृत्यु भएको प्रदेश १ प्रहरी कार्यालय विराटनगरले जनाएको छ। दुर्घटनामा गम्भीर घाइते भएका उनको उपचारका क्रममा राति ९ बजे न्युरो अस्पताल विराटनगरमा मृत्यु भएको हो।
उदयपुरको त्रियुगा नगरपालिका–७ मा गाईघाटबाट चुहाडेतर्फ जाँदै गरेको लु ३ त ४४४९ नम्बरको ट्रयाक्टरले विपरित दिशावाट आउँदै गरेको लु ४९ प ४०७४ नम्बरको मोटरसाइकललाई ठक्कर दिंदा अर्को दुर्घटना भएको छ।
दुर्घटनामा परेर घाइते भएका मोटरसाइकल चालक उदयपुरगढी गाउँपालिका–७ का ३५ वर्षीय कालिन्दा भण्डारीको उपचारका क्रममा बीपी कोइराला स्वास्थ्य विज्ञान प्रतिष्ठान धरानमा मृत्यु भएको प्रहरीले जनाएको छ। उदयपुर प्रहरी प्रमुख एसपी चन्द्रदेव राईका अनुसार राति साढे ८ बजे भण्डारीको मृत्यु भएको हो। ठक्कर दिने ट्रयाक्टर र चालकलाई नियन्त्रणमा लिएर घटनाको अनुसन्धान सुरु गरिएको उनले बताए।
प्रतिक्रिया दिनुहोस !
