आई वान्ट फ्रिडम

सिर्जना विष्ट मोडलिङ क्षेत्रमा नौलो नाम हो । धरानकी रैथाने विष्ट हाल कोटेश्वरमा परिवारसँगै बस्छिन् । मिड भ्याली इन्टरनेसनल कलेजमा पढ्दै गरेकी विष्ट ब्याचलर्स इन हस्पिटालिटी म्यानेजमेन्टकी विद्यार्थी हुन् ।

गहुँगोरो वर्णकी सिर्जना हल्का सेतो रङको वान पिसमा निकै खुलेकी थिइन् । पढाइ, फोटोसुट, रनवे सो, फेसन सोकी पारखी उनले भर्खरै मात्र रामकृष्ण ढकालको ‘न दिलमा बास दियौ’ बोलको म्युजिक भिडियोमा अभिनय गरेर चर्चा बटुलेकी छन् ।

केही लजालु र गम्भीर स्वभावकी विष्टले जिन्दगी, भोगाइ, मोडलिङका अनेक अनुभव सुनाउँदै निकै बेर बिताइन् । कुराकानीको सुरुआतमै उनले जिन्दगीलाई खुसी खुसीको सँगालो बनाउन चाहेको बताइन् । निकै खुलेर गफ गर्न हौसिएकी उनी आत्मविश्वासका साथ आफ्नो अनुभव बाँडिरहेकी थिइन् । ‘लाइफ इज कलेक्सन अफ ह्यापिनेस’, मुस्काउँदै जिन्दगीप्रतिको धारणा व्यक्त गरिन् उनले ।

हरेक दिन नयाँ कुरा सिक्न रुचाउने विष्ट मोडलिङमा करिअर बनाउने ध्याउन्नमा छिन् । फिल्म हेर्दा होस् या टीभी हेर्दा नै किन नहोस्, उनलाई नयाँ नयाँ डिजाइनका ड्रेस लगाएर गरिने क्याटवाक निकै मन पथ्र्यो । आफूलाई पनि फोटो सुट गर्न मन लाग्थ्यो । यसै क्रममा मिस टिनएजर्स इन्टरनेसनल नेपाल २०१५ मा सहभागी भइन् । त्यहाँ उनले उपाधि जित्न नसके पनि मिस फोटोजेनिक र मिस इन्टेलेक्चुअलको अवार्ड प्राप्त गरिन् ।

एक भाइ र बहिनीकी दिदी सिर्जना जिन्दगी बिनाबन्धन जिउन पाउनुपर्ने विचार राख्छिन् । उनी भन्छिन्, ‘एक बारको जीवन हो, मन लागेको सबै अनुभव गर्नुपर्छ ’ । ‘सानो हुँदासम्म सानै छौ, यस्तो गर्नु हुन्न, ठूलो भएपछि अब त ठूली भयौ समाजले के भन्ला ? अरूले के सोच्ला भनेरै हुर्काइन्छ हामीलाई’, अनुभव सुनाउँदै उनले भनिन्, ‘हामी छोरीले आफ्नो रहर लागेको जिन्दगी बाँच्ने कहिले त ? ’

छोराछोरीलाई विभेद नगरी स्वतन्त्र वातावरणमा हुर्काउनुपर्ने विचार राख्दै उनले अहिलेको योङ जेनेरेसनले हरेक कुरा अनुभव गर्न चाहने बताइन् । ‘कहिलेकाहीँ साथीसँग घुम्न मन लाग्छ, कहिले क्लब गएर रातभरि नाच्न मन लाग्छ, कहिले चुरोट तानेर जिन्दगीलाई बुझ्न मन लाग्छ, कहिले मनलाग्दी पिएर वाइल्ड हुन मन लाग्छ । अहिलेको युवा खासमा यो चाहन्छ ।’ उनले आफूलगायत आफ्ना साथीको अनुभव सुनाइन् ।

स्कुल पढ्ने तीनजना साथी मिलेर घरमा नभनी घुम्न गएको पल उनलाई जिन्दगीको सबैभन्दा बेस्ट समय लाग्छ । उनीहरू तीनजना मिलेर स्कुटीमा घुम्न निस्के । पोखरा पुगे, लेकसाइड गएर दुई दिनसम्म नाचे । रातभरि लेकसाइड घुमेर बिताए । कहिले रेस्टुराँमा बियर पिउँथे त कहिले क्लबमा नाच्थे । कहिले फेवातालको किनारै किनार हिँड्थे । ‘जिन्दगीमा पहिलोपटक यसरी स्वतन्त्र भएर घुमेकी थिएँ । परिवारसँग हिँड्दा यति रमाइलो कहिल्यै भोगेकी थिइनँ’, उनले स्पष्टीकरण दिइन् । उनीहरू पोखरा, बन्दीपुर, चितवन घुमेर सात दिनमा काठमाडांै फर्किएका थिए ।

लेकसाइडमा टु मच बियर पिएपछि उनले ड्रिङ्स गर्न नै छाडिन् । किन त ? त्यहाँ हामीले अत्यधिक खाएका थियौं । मेरो शरीरले सुट गरेन । त्यसपछि मैले पिउनै छाडिदिएँ । मानिसहरू भन्ने गर्छन्— छोराछोरीलाई स्वतन्त्र छाडिदियो भने बिग्रन्छन् । तर उनी यसमा सहमत छैनन् । ‘के हो बिग्रनु भनेको ? कुनै पनि युवतीले ब्वाइफ्रेन्ड बनाउनु भनेको बिग्रनु हो ? कि कोहीसँग डेटमा जानु बिग्रनु हो ? बिग्रनुको चरित्र के हो ? ’, उनले आक्रोश पोखिन् । स्वतन्त्रतासँगै जिम्मेवारी पनि दिनुपर्ने उनको अनुभव छ ।

आफ्ना उमेरका साथीलाई उनको सुझाव पनि छ । स्वतन्त्र हुने नाममा गलत कामचाहिँ गर्नु हुँदैन । जबसम्म आफैं कमाउन सक्ने बनिँदैन तबसम्म बुवाआमाको पैसाले मनलाग्दी गर्नु ठीक होइन । काम र करिअरको क्षेत्रमा कहिल्यै कसैसँग सम्झौता गर्न नहुने उनको तर्क छ ।

नेपालमा मोडलिङ क्षेत्रमा केही परिवर्तन भए पनि क्षमता हुनेलाई भन्दा आफ्नालाई अवसर दिने गरेको अनुभव बटुलेकी छन् उनले । उनी भन्छिन्, ‘सानोमा म चञ्चले स्वभावको तर लजालु थिएँ । आफ्नो कुरा भन्न सक्दिनथेँ । मोडलिङमा लागेपछि बोल्न सक्ने भएकी छु । कन्फिडेन्ट बढेको छ । काम सिक्दै छु । छिट्टै भाइरल हुने रहर पनि छैन ।’

मोडलिङमा आउन आफ्नो चाहना मात्रै नभएर परिवारको पनि पूरा साथ हुनुपर्ने उनको तर्क छ । भन्छिन्, ‘मलाई मेरो परिवारले कहिल्यै पनि रोक लगाएन । राम्रो कामका लागि सधैं सहयोग ग¥यो ।’ १२ पढ्ने बेला कलेज बंक गर्ने बानी लागेको थियो । स्कुलमा म्यामको कुटाइ खाएको अनुभव पनि बटुलेकी विष्ट गलत काममा हरेक आमाबाबुले विचार गर्नुपर्ने सुझाउँछिन् । पढाइका अलावा सोल्टी होटलमा इन्टर्न पनि गर्दै गरेकी सिर्जना रहर पूरा गर्न आफूलाई कुनै पनि काममा व्यस्त राख्नुपर्ने जवाफ दिन्छिन् ।

मोडलिङ, ग्ल्यामर अन्तर्राष्ट्रिय स्तरमा पनि सबैको चासोको क्षेत्र भएकाले यहाँ राम्रो नराम्रो हल्ला बढी हुने उनको बुझाइ छ । ‘काम हो, यो गर्छु, यति मात्रै गर्छु भन्नु ठीक हुन्न । कथा र घटनाअनुसार खुल्नुपर्ने हुन्छ’, उनले भनिन् । हट देखिने भन्दैमा जता पनि लुगा खोलेर चर्चित हुन नसकिने उनको बुझाइ छ । तर चाहिने ठाउँमा खुल्न सकिएन भने त्यो पनि ठीक नहुने बताउँछिन् उनी । आफूलाई मन परेको कथा र गीतमा आवश्यकताअनुसार खुल्न समस्या नभएको उनले जानकारी दिइन् ।