दोलखा : दोलखा सदरमुकाम चरिकोटबाट झापा जिल्लाको काकडभिट्टासम्म बस सेवा सञ्चालनमा आएको छ ।
रोल्वालिङ यातायात सहकारी संस्था लि, अरनिको यातायात सेवा समिति, बिपी यातायात तथा पूर्वको मेची यातायातको संयुक्त पहलमा बुधवारबाट दोलखा–झापा बस सेवाबाट जोडिएको हो ।
चरिकोट–काकडभिट्टा बस सेवा सञ्चालन हुनुअघि चरिकोटबाट बर्दिवाससम्म मात्र बससेवा सञ्चालनमा थियो । बर्दिवासबाट अर्को सवारी साधन चढ्नुपर्ने बाध्यता यात्रुहरुलाई थियो ।
रोल्वालिङ यातायात सहकारी संस्थाका अध्यक्ष बालकृष्ण आचार्यले काकडभिट्टा जान लागेको रोल्वालिङ यातायात सहकारीमा आवद्ध बसका चालकलाई खादा लगाई चरिकोट–काकडभिट्टा बस सेवा सञ्चालन भएको औपचारिक रुपमा जानकारी दिएका हुन् ।
एउटा बस दैनिक चरिकोटबाट अपरान्ह २ बजे काकडभिट्टाको लागि छुट्ने छ भने काकडभिट्टाबाट अपरान्ह २ बजे चरिकोटका लागि छुट्ने आचार्यले बताए । चरिकोटदेखि काकडभिट्टासम्मको भाडा एकहजार एकसय निर्धारण गरिएको छ । यात्रुको चापलाई हेरी आवश्यक परेमा बसको संख्या बढाइने अध्यक्ष उनले बताए ।
चरिकोट काकडभिट्टासम्म सिधा बस सेवा सञ्चालन हुँदा आफूहरुलाई आवतजावत गर्न सजिलो भएको चरिकोटमा मजदुरी गरिरहेका भारदहका रामदयाल महतोले बताए । रोल्वालिङ यातायात सहकारी संस्था लिमिटेड, अरनीको यातायात सेवा समिति, बिपी यातायात तथा मेची यातायातको सहमतिमा बस सेवा सञ्चालनमा ल्याइएको रोल्वालिङ यातायात सहकारीले बताएको छ ।
प्रतिक्रिया दिनुहोस !
