नुवाकोट : त्रिदेशीय मार्गको रुपमा रहेको त्रिशूली–रसुवागढी सडकमार्गमा भएको टाटासुमो दुर्घटनामा ज्यान गुमाउनेको संख्या तीन पुगेको छ । दुर्घटनामा तीन जनाको घटनास्थलमै ज्यान गएको प्रहरीले बताएको छ ।
दुर्घटनास्थलमा दुई महिलासहित तीन जना हराइरहेका छन् । अन्य ५ जना घाइते भएका छन् । घाइतेमध्ये चार जनाको अवस्था गम्भीर रहेको प्रहरीले बताएको छ ।
घाइतेहरुको काठमाडौँको दुई अस्पतालमा उपचार भइरहेको जिल्ला प्रहरी कार्यालय रसुवाले जनाएको छ । वीरगन्ज–गल्छी–त्रिशूली–मैलुङ–रसुवागढी सडकमार्ग अन्र्तगत रसुवाको गुम्चेतमा सोमबार बेलुकी साढे ६ मा टाटासुमो दुर्घटना हुँदा त्यसमा यात्रारत दुई महिलाको घटनास्थलमै र एक जनाको उपचारका लागि नुवाकोट जिल्ला अस्पताल त्रिशूली लैजाँदै गर्दा बाटोमै ज्यान गएको जिल्ला प्रशासन कार्यालय रसुवाले जनाएको छ ।
मृतकहरुमा रसुवाको आमाछोदिङ्मो गाउँपालिका वडा नं. ४ की ३५ वर्षीया मेन्दु घले, सोही स्थानकी ३२ वर्षीय साँहिली घले र ३२ वर्षीय नोर्वु तामाङ रहेको प्रहरी निरीक्षक इश्वरी भण्डारीले जानकारी दिए । महिलाहरुको घटनास्थलमै र नोर्वुको उपचारका लागि त्रिशूली लैजाँदा बाटोमा ज्यान गएको भण्डारीले बताए ।
रसुवाको दक्षिणी भेगमा रहेको गोसाइकुण्ड गाउँपालिका ६ स्थित गुम्चेतमा टाटासुमो खसेर त्रिशूली नदीमा पुगेको छ । भण्डारीका अनुसार पोखराबाट नुवाकोटको विदुर हुँदै रसुवाको गोल्जुङ जाँदै गरेको बा १० च ५८२० नम्बरको टाटासुमो जीप मैलुङ–रसुवागढी सडकखण्डको गुम्चेतमा सडकमार्गबाट एकसय मिटर तल खसेर दुर्घटना भएको हो । दुर्घटनामा आमाछोदिङ्मो गाउँपालिका वडा नं. ४ गोल्जुङका ४८ वर्षीय पासाङदे घले, महिलाहरु १९ कामीयाङ्जेन तामाङ र २० वर्षीया ल्येतङ घले हराइरहेका छन् ।
दुर्घटनामा आमाछोदिङ्मो गाउँपालिका वडा नं. ४ गोल्जुङका ३२ वर्षीय गाडी चालक रंगे भनिने निमा तामाङ, सोही स्थानका ३५ वर्षीया जौरानी घले, ५ वर्षीय फुर्वुयाङ्जेन तामाङ, २९ वर्षीय योन्जुङ तामाङ र ३ वर्षीय बालक निमछोवाङ तामाङ घाइते भएको रसुवा प्रहरी प्रमुख तथा प्रहरी नायव उपरीक्षक भाग्येन्द्रपुरुष ढकालले जानकारी दिए । चालक निमा र जौरानीकामे धापासिस्थित ग्रिनसिटी अस्पताल र अन्य तीन जनाको न्युरो अस्पताल बाँसबारीमा उपचार भइरहेको ढकालले बताए ।
हराइरहेका तीन जनाको मंगलबार विहानैदेखि घटनास्थलमा खोजी कार्य सुरु गरिएको रसुवाका सहायक प्रमुख जिल्ला अधिकारी देवर्षि सापकोटाले जानकारी दिए ।
घाइते तथा मृतकको स्थानीयवासी, त्रिशूली–१ जलविद्युत आयोजनामा कार्यरत कर्मचारी, नेपाल प्रहरी, सशस्त्र प्रहरी र नेपाली सेनाको टोलीले उद्धार गरी उपचारको लागि नुवाकोट जिल्ला अस्पताल त्रिशूली पठाएको थियो । त्रिशूलीमा प्रारम्भिक उपचार गरी राती नै थप उपचारका लागि काठमाडौँ पठाइएको प्रहरीले जानकारी दियो।
प्रतिक्रिया दिनुहोस !
