अमेरिका जान शरणार्थी बन्दै नागरिक : ‘भारतीय पनि शरणार्थी बन्न आउँछन् !
जेठ २९, २०७६ बुधबार १९:५८:०
दमक : झापाको दमकस्थित भुटानी शरणार्थी शिविरभित्र गैर शरणार्थीलाई पुनर्वासका नाममा विदेश पठाउने गिरोह सक्रिय रहेको खुलासा भएको छ ।
यहाँ बसोबास गर्ने तर दर्ता प्रक्रियामा छुटेका असली भुटानी शरणार्थी भन्दा बाहिरकै असली नागरिकलाई नक्कली शरणार्थी बनाएर विदेश पठाउने गिरोह सक्रिय रहेको सरकारका प्रतिनिधि शिविर प्रमुख सुरेन्द्रराज दाहालले बताएका हुन् ।
यसरी अमेरिका जानको लागि शरणार्थी बन्न भारतबाट समेत आउने गरेको बताइन्छ । दाहालले आफूसँग यस सम्बन्धी तथ्यांक नै रहेको पनि दावी गरेका छन् ।
उनले शिविरभित्र दर्ता प्रक्रियाका लागि आएका धेरैजसो डाटा गलत रहेको पनि बताएका छन् । शिविरभित्र विदेश पठाइदिने प्रलोभनमा पार्ने गिरोह रहेकोले त्यसबाट बच्न सचेत पनि गराएका थिए । दाहालले भने, ‘म यहाँबाट सरुवा भएर जाँदैछु तर तपाइँहरु सचेत रहनूस् । तपाइँहरुबीच नै गलत व्यक्ति छन्, जसले अमेरिका पठाइदिन्छु भन्दै ठगी गरिरहेका छन् ।’
उनका अनुसार गिरोहले शिविरलाई आफू अनुकुल प्रयोग गर्दैआएको छ । ‘यतिसम्म कि, ढड्डामा भएको फोटो समेत परिर्वतन गरिएको छ,’ दाहालले भनेका छन् ।
दाहालले आफूलाई पछिल्लो समय गिरोहबाट सुरक्षा चुनौती रहेको पनि बताएका छन् । तर यसबारे सरकारको माथिल्लो तहसम्म जानकारी गराइसकेको पनि उनी बताउँछन् ।
शिविरभित्र दर्ता प्रक्रियामा आएकाहरुको लागि अध्ययन गर्न बनेको जोइन्ट भेरीफिकेसन टिम (जेभिटी)ले निकालेको तथ्यांक अनुसार ठूलो संख्यामा गलत व्यक्तिहरु दर्ता प्रक्रियामा आएको भेटिएको छ । १७४१ जना दर्ता प्रक्रियामा छुटेको भनिए पनि ३ सय मात्र रहेको दाहालको भनाइ छ ।
कार्यक्रममा बोल्दै शिविर सचिव कृष्ण सुब्बाले पनि दर्ता प्रक्रियामा विभिन्न प्रलोभन तथा धम्की आउने गरेको बताए । विशेषगरी भारतीय नागरिकहरु शरणार्थी बनेर विदेश जान भन्दै शिविरभित्र आउने गरेको सचिव सुब्बाले बताएका छन् । दमकस्थित बेलडाँगी क्याम्पमा रहेका मोतिलाल थापाको नामबाट एक गैर शरणार्थी नागरिक अमेरिका पुगिसकेको बताइएको छ ।
यस्तै केही भारतीय नागरिकहरु समेत शरणार्थीको दर्ता प्रक्रियामा आएको तर त्यस्ता गैरशरणार्थी नागरिकको दर्ता खारेज गरिएको सुब्बाले बताए । अहिले शिविरमा दर्ता भएका भुटानी शरणार्थीहरुको संख्या ६ हजार ५ सय भन्दा बढी छ । पुनर्वास कार्यक्रम अन्र्तगत विभिन्न मुलुकमा एक लाख भन्दा बढी शरणार्थीहरु गइसकेका छन् ।
प्रतिक्रिया दिनुहोस !
