विराटनगर : मोरङको सुन्दरहरैंचा र सुनवर्षी नगरपालिकामा भएका अलग-अलग दुर्घटनामा परेर दुई जनाको मृत्यु भएको छ । पूर्व–पश्चिम राजमार्ग अन्तर्गत सुन्दरहरैंचा–३ मा सोमबार बिहान भएको दुर्घटनामा एक महिलाको मृत्यु भएको छ । पूर्वबाट पश्चिमतर्फ जाँदै गरेको को २ च १८६१ नम्बरको म्याजिक भेनको ठक्करबाट अनियन्त्रित बनेको को २२ प २४८४ नम्बरको स्कुटर सडकमा गुडिरहेको को १ ख ३५०५ नम्बरको ट्रकमा गएर ठोक्किँदा दुर्घटना भएको हो ।
दुर्घटनामा स्कुटरको पछाडि सवार पथरीशनिश्चरे नगरपालिका–८ की २८ वर्षीय यमुना बास्तोलाको मृत्यु भएको मोरङ प्रहरीका प्रवक्ता डीएसपी घनश्याम श्रेष्ठले बताए । उनका अनुसार घटनामा घाइते भएकी बास्तोलको उपचारका क्रमममा नोवेल शिक्षण अस्पताल विराटनगरमा मृत्यु भएको हो । दुर्घटनामा परेर घाइते भएका स्कुटर चालक नानीमैया लिम्बू र उनका ६ वर्षीय छोरा गोविनको नोवेलमै उपचार भइरहेको छ ।
त्यस्तै रंगेली–विराटनगर सडकखण्ड अन्तर्गत सुनवर्षी नगरपालिका–९ भेडुवाथान नजिकै आइतबार राति १० बजे भएको दुर्घटनामा परेर एक जनाको मृत्यु भएको छ । पूर्वबाट पश्चिमतर्फ जाँदै गरेको को २ त २३२० नम्बरको ट्याक्टरमा को ५ प ११७९ नम्बरको मोटरसाइकल पछाडिबाट ठोक्किँदा दुर्घटना भएको इलाका प्रहरी कार्यालय रंगेलीका प्रहरी निरीक्षक कवीन्द्र कार्कीले बताए ।
उनका अनुसार दुर्घटनामा सुनवर्षी–४ अमरदहका ४५ वर्षीय दिलिपकुमार विश्वकर्माको घटनास्थलमै मृत्यु भएको हो । प्रहरीले दुवै दुर्घटनामा संलग्न सवारी साधन र चालकलाई नियन्त्रणमा लिएर घटनाको अनुसन्धान सुरु गरिएको जनाएको छ ।
प्रतिक्रिया दिनुहोस !
