कांग्रेसका बागीको अभिलेख नष्ट
काठमाडौं : स्थानीय, प्रदेशसभा र प्रतिनिधिसभा निर्वाचनमा बागी उम्मेदवारी दिएकाहरूलाई मंगलबार कांग्रेसले कारबाही गरेको छ । केन्द्रीय अनुशासन समितिको बैठकले २५ जिल्लामा बागी बनेका १ सय ८३ जनाको नाम पार्टी अभिलेखबाट हटाउन निर्देशन गरेको छ । कारबाही पर्नेमा सबैभन्दा बढी पर्सामा ३२, त्यसपछि दाङ र रूपन्देहीमा २२÷२२ जना छन् । त्यसैगरी, काठमाडौंमा १५, ललितपुरमा नौ र बाँकेमा ११ जना कारबाहीमा परेको समितिका संयोजक भीष्मराज आङ्देम्बेले जनाएका छन् । कारबाहीमा परेकाहरू वडादेखि प्रतिनिधिसभा निर्वाचनसम्मका बागी उम्मेदवार छन् ।
सभापति शेरबहादुर देउवाको गृहजिल्ला डडेलधुरा र वरिष्ठ नेता रामचन्द्र पौडेलको गृहजिल्ला तनहुँका भने यो सूचीमा परेका छैनन् । यी दुई जिल्लामा पनि पार्टीका उम्मेदवारविरुद्ध बागी उम्मेदवारी परेको र असहयोग गरेको उजुरी परेको थियो । वरिष्ठ नेता पौडेलविरुद्ध बागी उम्मेदवारी दिएका नेता गोविन्दराज जोशी र उनका प्रस्तावक–समर्थकलाई यसअघि नै केन्द्रीय पार्टी कार्यालयले कारबाही गरेको थियो । सभापति देउवाको गृहजिल्लाबाट जिल्ला सभापति कर्ण मल्लविरुद्ध उजुरी समितिमा आएको छ ।
गत चैत पहिलो साता समितिको संयोजकमा आङदेम्बे मनोनीत भएका थिए । निर्वाचनलगत्तै तात्कालिक समिति संयोजक रमेश रिजालले देशभरबाट उजुरी संकलन गरे पनि कारबाही नगरी राजीनामा दिएका थिए । आङ्देम्बेले भने एक महिनाको समय दिँदै ७७ वटै जिल्ला कार्यसमितिलाई आआफ्नो जिल्लाको उजुरी केन्द्रीय कार्यालयमा पठाउन निर्देशन दिएका थिए । चैतसम्म पुनः उजुरी संकलन गरेको समितिले वैशाख पहिलो सातादेखि त्यसको अध्ययन थालेको थियो ।
आङदेम्बेका अनुसार जिल्लाबाट प्राप्त उजुरीको सूक्ष्म अध्ययनपछि समितिले मंगलबार निर्णय गरेको हो । निर्णयमा नेपाली कांग्रेसको विधान, २०१७ (संशोधनसहित) को धारा ३४ को उपधारा ४ (क) बमोजिम कारबाही गरिएको उल्लेख छ । कारबाहीमा परेका १ सय ८३ जना बागीका प्रस्तावक र समर्थकको नामसमेत पार्टी अभिलेखबाट हटाउन निर्देशन दिइएको समितिले जारी गरेको प्रेस विज्ञप्तिमा उल्लेख छ । प्रस्तावक र समर्थकको नाम समितिमा पठाउन निर्देशन दिइएको छ ।
समितिले निर्वाचनमा अन्तर्घात गर्नेहरूसँगै पार्टीको हितविपरीत काम गरेकाहरूको उजुरी संकलन गरेको थियो । बाँकी उजुरी अध्ययन भइरहेको समितिले जनाएको छ । समितिमा १ हजार २ सयहाराहारी उजुरी परेका छन् । यसअघि समितिले ३ सयभन्दा बढीसँग स्पष्टीकरणसमेत सोधेको थियो ।
कुन जिल्लामा कति कारबाही ?
१, बाँके ११
२, बारा ३
३, चितवन १३
४, दाङ २२
५, धनुषा १०
६, इलाम ४
७, झापा ७
८, कैलाली २
९, कपिलवस्तु ३
१०, कास्की १
११, काठमाडौं १५
१२, ललितपुर ९
१३, लमजुङ ५
१४, मोरङ १
१५, नवलपरासी १
१६, पाल्पा ४
१७, पाँचथर १
१८, पर्सा ३२
१९, रसुवा १
२०, रौतहट २
२१, रुपन्देही २२
२२, संखुवासभा १
२३, सिरहा २
२४, ओखलढुंगा ८
२५, सुनसरी ३