अमेरिका : न्यूयोर्कबाट प्रकाशित हुँदैआएको ‘एभरेस्ट टाइम्स’पत्रिकाले नेपालको दुर्गम जिल्लाका विद्यालयलाई सहयोग गर्दैआएको छ ।
अमेरिकामा काठमाडौं ईन्टरनेशनल माउन्टेन फिल्म फेष्टिबल (किम्फ) आयोजना गरी यसबाट उठेको रकमले दुर्गम जिल्लाका विद्यालयलाई सहयोग गर्दैआएको पत्रिकाका प्रधानसम्पादक आङछिरिङ शेर्पा बताउँछन् ।
नेपालको ग्रामीण भेगको वास्तविक कथावस्तु समेटेर बनाइएका विभिन्न डकुमेन्ट्री किम्फमा देखाइन्छ । यस पटक सुपरमङ्क, मरिसकेको मान्छे, तातिनी, माउन्टेनमदर, डोल्पा डायरी र कथा ७२ जस्ता चलचित्र प्रर्दशन गरिएको थियो ।
त्यसो त, पाँच वर्षदेखि काठमाडौं ईन्टरनेशनल माउन्टेन फिल्म फेष्टिबल र नेपालमा हिमाल एसोसियसनसँगको सहकार्यबाट सहयोग गर्दैआएको हो । यस पटकको किम्फमा भने कलेजमा अध्ययन गर्ने विद्यार्थी साथै अन्य मुलुकका दर्शक पनि सहभागी थिए । एभरेस्ट टाइम्सले हरेक वर्ष अमेरिकामा आयोजना गर्ने किम्फबाट उठ्ने रकम नेपालको ग्रामीण भेगको विद्यालयलाई सहयोग गदै आइएको हो ।
उक्त पत्रिकाले सोलुखुम्बु जिल्लाको चाँगेस्थान मावि केरुङ र सेर्गा बागम प्रावि सेर्गा, सिन्धुपाल्चोकको जम्बीयाङ प्रावि र रामेछापको बाल्दिङ विद्यालयलाई सहयोग गरिसकेको छ ।
यस पटक किम्फबाट उठ्ने रकम भोजपुर जिल्लाको कुनै दुर्गम विद्यालयलाई दिने योजना रहेको जनाइएको छ । प्रधानसम्पादक शेर्पा भन्छन्, ‘प्रवासमा ग्रामीण भेगको मन छुने राम्रो डकुमेन्ट्री देखाएर नेपालको चिनारी दिनुको साथै यस कार्यक्रमबाट संकलन रकम दुर्गम गाउँको विद्यालयलाई सहयोग गर्न पाउँदा खुसी लागेको छ ।’
प्रतिक्रिया दिनुहोस !
