पृतनापति कपमा भवानीबक्स च्याम्पियन
धनगढी : नेपाली सेनाको सुदूरपश्चिम पृतनापति ट्रफीमा भवानीबक्स गण च्याम्पियन भएको छ। विभिन्न ७ विधाका ६५ इभेन्टमा उसले ४२ स्वर्ण, १४ कास्य र २० रजत गरी ७६ पदक जित्दै च्याम्पियन भएको हो।
यस्तै १६ स्वर्ण, ३० कास्य र १६ रजत गरी ६२ पदक जित्दै रुद्रध्वज गण द्वित्तीय भएको छ। १५ स्वर्ण, १५ कास्य र १८ रजत गरी ४९ पदक जितेर भवानीदल गण तृत्तीय भएको छ भने तीन स्वर्ण, ७ कास्य र ३ रजत पदक जित्दै रणबम गण चौथो भएको छ।
नेपाली सेनाको कैलाली र कञ्चनपुर ब्यारेकमा भएका खेलकुदका विजेता खेलाडीहरुलाई सुदूरपश्चिम पृतनाका पृतनापति उपरथी बालकृष्ण काकीले पुरस्कार र प्रमाणपत्र वितरण गरे। प्रतियोगितामा ३२१ जना पुरुष सैनिक र २५ जना महिला सैनिक गरी ३४६ जनाको सहभागिता थियो।
प्रतियोगितामा सर्वाधिक पदक जित्ने पुरुष खेलाडी भवानीबक्स गणका प्युठ राम बहादुर पुनले स्विमिङतर्फ ७ स्वर्ण जिते भने महिलातर्फ भवानीबक्स गणकी सिपाही गीता चन्दले एथ्लेटिक्स र तेक्वान्दो खेलमा सर्वाधिक ७ स्वर्ण जितिन्।