विराटनगर : मोरङका सोमबार अलग–अलग स्थानमा भएका दुई घटनामा दुईजनाको मृत्यु भएको छ ।
सुन्दरहरैचा नगरपालिका–१० मितेरी टोलमा पानीमा डुबेर १७ महिने बालक पाङचुहाङ सम्बाहाम्फेको मृत्यु भएको प्रहरीले जनाएको छ । फुपू कमला धिमालको घरमा गएका उनी भाँडोमा जम्मा गरेर राखेको पानीमा डुबेपछि मृत्यु भएको हो ।
प्रहरीका अनुसार डुबेर गम्भीर घाइते भएका नाबालकको सुकुना सामुदायिक अस्पतालमा उपचारका क्रममा मृत्यु भएको हो । त्यस्तै पिसाव फेर्न निस्कने क्रममा आफ्नै घरबाट लडेर मोरङको बेलबारी नगरपालिका–९ का ६० वर्षीय सुकदेव चौधरीको मृत्यु भएको छ । आइतबार राति ११ बजे घरको बरन्डाबाट खसेर उनी गम्भीर घाइते भएका थिए ।
घाइते चौधरीको उपचार गर्न न्युरो अस्पताल विराटनगर ल्याउने क्रममा बाटोमै मृत्यु भएको इलाका प्रहरी कार्यालय बेलबारीका प्रहरी निरीक्षक रामकुुमार राईले बताए । चौधरी सत्तारुढ बेलबारीका स्थानीय नेता समेत हुन् । प्रहरीले दुवै घटनाको अनुसन्धान सुरु गरिएको जनाएको छ ।
प्रतिक्रिया दिनुहोस !
