मुम्बई : आफ्नो टोली हालै सम्पन्न विश्वकप क्रिकेटबाट रित्तो हात घर फर्किएपछि दुई चिरप्रतिद्वन्द्वी भारत र पाकिस्तान क्रिकेट बोर्ड नयाँ प्रशिक्षकको खोजीमा जुटेका छन् । भारत र पाकिस्तान दुवैले राष्ट्रिय क्रिकेट टोलीमा नयाँ प्रशिक्षक नियुक्त गर्न लागेका हुन् । भारतीय टोली विश्वकपको सेमिफाइनलमा न्युजिल्यान्डसँग पराजित भएको थियो ।
पाकिस्तानी टोली भने लिग चरणबाटै घर फर्किएको थियो । लिग चरणमा पाकिस्तानी टोली पाँचौं भएको थियो । भारतीय क्रिकेट कन्ट्रोल बोर्ड (बीसीसीआई) ले नयाँ प्रमुख प्रशिक्षकका लागि प्रस्ताव आह्वान गरिसकेको छ । भारतीय टोलीका वर्तमान प्रमुख प्रशिक्षक रवि शास्त्रीको पदावधि विश्वकपलगत्तै सकिएको थियो ।
त्यसपछि बीसीसीआईले ४५ दिनका लागि शास्त्रीको पदावधि थप गरेको छ । निकट भविष्यमा हुने भारतीय टोलीको वेस्ट इन्डिज भ्रमणपछि शास्त्रीको थप गरिएको पदावधि पनि समाप्त हुनेछ । वेस्ट इन्डिज भ्रमणका क्रममा भारतले आयोजक राष्ट्रसँग टेस्ट, एकदिवसीय र टीट्वेन्टी शृंखला खेल्ने कार्यक्रम छ ।
यसैगरी विश्वकपको समीक्षा र नयाँ प्रशिक्षकको खोजीका लागि पाकिस्तान क्रिकेट बोर्ड (पीसीबी) को बैठक पनि छिट्टै बस्ने भएको छ । पीसीबीको बैठकमा राष्ट्रिय टोलीको कप्तानको विषयमा पनि निर्णय लिइने बताइएको छ । पीसीबीको बैठक यसै महिनाको अन्त्यमा बस्ने सम्भावना छ ।
पाकिस्तानी टोलीका वर्तमान प्रशिक्षक माइकी अर्थरलाई विश्वकपकै क्रममा उनको पदावधि नथपिने जानकारी गराइसकिएको पीसीबीका अधिकारीले जनाएका छन् । पीसीबीका अधिकारीहरू नयाँ प्रशिक्षकको खोजीमा छन् । पीसीबीले जिम्बाबेको राष्ट्रिय क्रिकेट टोलीका पूर्वकप्तान एन्डी फ्लावरलाई प्रशिक्षक बनाउन सक्ने सम्भावना पनि छ । फ्लावर इङ्ल्यान्डका पूर्वप्रमुख प्रशिक्षक पनि हुन् ।
पाकिस्तानमा देशभित्रैबाट नयाँ प्रशिक्षकको खोजी गरिनु पर्ने बहस पनि चलेको छ । ‘प्रशिक्षकका लागि एन्डी फ्लावरको नाम पनि चर्चामा छ । फ्लावरको क्षमताबाट हामी प्रभावित छौं । तर, देशभित्रैबाट नयाँ प्रशिक्षक खोजी गरिनुपर्ने माग पनि उत्तिकै चर्को रूपमा उठेको छ’, पीसीबीका एक अधिकारी भन्छन् ।
प्रतिक्रिया दिनुहोस !
