४० लाख सेवाग्राही भएकाले सोचेजस्तो सेवा दिन सकेनौँ : मेयर शाक्य
काठमाडौं : काठमाडौं महानगरपालिकाका मेयर विद्यासुन्दर शाक्यले ठूलो संख्यामा रहेका सेवाग्राहीलाई सोचे अनुसारको सेवा दिन नसकेको स्वीकार गरेका छन् । बिहीबार राजधानीमा आयोजित एक कार्यक्रममा बोल्दै मेयर शाक्यले यस्तो बताएका हुन् ।
‘काठमाडौँ देशको राजधानी हो,’ उनले भने, ‘अहिले काठमाडौँ महानगरपालिकाका सेवाग्राहीको संख्या ४० लाखको हाराहारीमा छ । त्यति मानिसलाई हामीले सेवा दिनु पर्ने बाध्यता छ । त्यसैले हामीले सोचे अनुसारको सेवा दिन सकेका छैनौँ ।’
काठमाडौँ महानगरपालिका अन्य स्थानीय सरकार भन्दा फरक रहेको भन्दै उनले यहाँका जनताको अपेक्षा बढी रहेको बताए । मातृभूमि महिला समाजले राजधानीमा गरेको ‘काठमाडौँ महानगरपालिका जनप्रतिनिधि तथा संघीय राज्य व्यवस्था’ नामक पुस्तक विमचोन कार्यक्रममा बोल्दै उनले यस्तो बताएका हुन् ।
वर्षा सकिएपछि महानगरबासीको अपेक्षा अनुसार नै कामले गति लिने उनको विश्वास छ । ‘वर्षा सकिने बित्तिकै कामले गति लिनेछ’, उनले भने, ‘हामी जनप्रतिनिधि हौँ, त्यसैले हाम्रो ध्यान महानगरवासीको अपेक्षा अनुसार अघि बढ्नुपर्छ । हामी त्यहि अनुसार खटिरहेका छौँ ।’
उनले सम्पदा संरक्षण आफ्नो पहिलो प्राथमिकतामा रहेको भन्दै सबै भन्दा बढी ध्यान सम्पदा पूर्ननिर्माणमा केन्द्रित गरेको प्रष्ट पारे । ‘सम्पदाको पुर्ननिर्माण गर्ने, हरियाली प्रर्वद्धन गर्ने कुरालाई प्राथमिकतामा राखेका छौँ,’ उनले भने ।
कार्यक्रम संस्कृतिविद् सत्यमोहन जोशी र मोदनाथ प्रश्रितलाई सम्मान गरिएको थियो ।