चिनियाँ-भारतीय नेता भेटवार्तादेखि अमेरिकालाई इरानकाे चेतावनीसम्म

ग्वाटेमालामा अलेजान्द्रो नयाँ राष्ट्रपति

ग्वाटेमाला सिटी : ग्वाटेमालामा हालै सम्पन्न राष्ट्रपतीय चुनावमा अलेजान्द्रो गियाम्मात्तेइ विजयी भएका छन् । वामोस पार्टीको तर्फबाट चुनावमा उठेका अलेजान्द्रो अबको राष्ट्रपति बन्दैछन् । ६३ वर्षीय अलेजान्द्रोको वामोस ‘कन्जरभेटिभ’ विचारधारा अवलम्वन गर्ने पार्टी हो ।

अन्तर्राष्ट्रिय मिडियाका अनुसार अब नयाँ राष्ट्रपतिको रुपमा उनले अपराध तथा सुरक्षा, मानवअधिकार लगायत विषयको चुनौती गर्नुपर्ने छ । सान्द्रा तोर्रेसविरुद्ध उनी ५८ दशमलब २६ मत ल्याउँदै विजयी भएका हुन् ।

अमेरिकाले गल्फमा हतियार बेचेकोमा इरानको चेतावनी

तेहरान : मध्यपूर्वी क्षेत्रमा अमेरिकाले ठूलो संख्यामा हतियार विक्री गर्दैआएको विषयमाथि इरानले कडा आलोचना गरेको छ । इरानी विदेशमन्त्री मोहम्मद जावद जरिफले अमेरिकाले अर्बौँका हतियार विक्री गरेकोमा चेतावनी दिएका हुन् ।

उनले गल्फ क्षेत्रलाई ‘पड्किन तयार टिन्डरबक्स’ भन्दै पछिल्लो समय अमेरिकाले गल्फ क्षेत्रमा हतियार बेचेकोमा आपत्ति जनाएका हुन् । अलजजिरालाई सोमबार दिएको अन्तरवार्तामा उनले गल्फमा युद्ध हुँदा असुरक्षा मात्रै बढ्ने प्रतिक्रिया दिएका छन् ।

चिनियाँ उपराष्ट्रपति–भारतीय विदेशमन्त्री भेटवार्ता

बेइजिङ : चिनियाँ उपराष्ट्रपति वाङ क्विसन र भारतीय विदेशमन्त्री सुब्रहमन्याम जयशंकरबीच भेटवार्ता भएको छ । चिनियाँ नेता वाङले चीन र भारत दुबै देश राष्ट्रिय विकास र रुपान्तरणको महत्वपूर्ण उचाइमा पुगेको बताएका छन् ।

उनीहरुले दुई देशबीच स्वस्थ विकास र आपसी सम्बन्धलाई दिगो बनाउनुपर्नेमा जोड दिएका थिए । भारतको सत्तारुढ दल भारतीय जनता पार्टीका नेताले चीनलाई ‘विस्तारवादी दुश्मन’ संज्ञा दिएको भोलिपल्टै दुई देशका नेताले भेटवार्ता गरेका हुन् ।

थाइल्याण्डमा भवन भत्किँदा तीनको मृत्यु

थाइल्याण्ड : थाइल्याण्डको फुकेटमा एउटा निर्माणाधिन भवन भत्किँदा त्यहाँ कार्यरत तीनजना कामदारको मृत्यु भएको छ । अरु आठजना घाइते भए । उक्त घटनाबारे अनुसन्धान भइरहेको प्रहरीले जनाएको छ । मृत्यु हुने सबै म्यानमारका नागरिक भएको सिन्ह्वाले उल्लेख गरेको छ ।

श्रीलंकामा हुरी-वर्षाबाट १७ सय भन्दा धेरै घरमा क्षति

कोलम्बो : हावाहुरी र भारी वर्षाको कारण श्रीलंकामा एक हजार ७ सयभन्दा धेरै घर क्षतिग्रस्त भएका छन् । यहाँको क्षति व्यवस्थापन केन्द्रका अनुसार गत बिहीबारदेखिको वर्षाले सोमबारसम्म १७ सय ४७ घरमा क्षति पुगेको छ । साथै २२ घर पूर्ण रुपमा भत्किएका छन् । सबैभन्दा धेरै नुएरा एलिया जिल्लामा क्षति पुगेको बताइएको छ । जहाँबाट ५० जना विस्थापित भएका छन् ।

गुगलले प्रदर्शन भड्काएको भन्दै रुसी सरकारको चेतावनी

मस्को : रुसमा निष्पक्ष निर्वाचनको माग गर्दै भइरहेको प्रदर्शनमा गुगलको पनि हात रहेको भन्दै त्यसो नगर्न सरकारले चेतावनी दिएको छ । गुगलले युट्युबमार्फत ‘अनधिकृत भिडियो’को प्रचार गर्दै प्रदर्शनलाई बढावा दिएको भन्दै सरकार रुष्ट बनेको हो । गुगलले यहाँ सरकारविरोधी प्रदर्शन भड्काएको भन्दै सरकारको सञ्चारसम्बन्धी निकायले चेतावनी दिएको हो । रुसमा अहिले दशौं हजार सरकारविरोधी आन्दोलनमा सडकमा उत्रिएका छन् । दर्जनौँलाई सरकारले पक्राउ गरेको छ ।

हङकङमा हजारौं प्रदर्शनकारी एयरपोर्टभित्रै, सबै उडान स्थगित

हङकङ : हङकङमा १० हप्तादेखि जारी आन्दोलन झन् विस्तार हुँदैगएको छ । सोमबार आन्दोलनकारीले नियमित उडान नै ठप्प पार्ने गरी एयरपोर्टभित्रै प्रदर्शन गरिरहेका छन् । प्रदर्शनका कारण सरकारले सोमबार सबै उडान स्थगित गरेको हो । अन्तर्राष्ट्रिय मिडियाका अनुसार एयरपोर्टमा अहिले हजारौंको संख्यामा प्रदर्शनकारी छन् । जसका कारण सडक र एयरपोर्ट पूरै ठप्प भएको छ । घटनाबारे थप विवरण आउन बाँकी नै रहेको बताइएको छ ।