मायोर्का : स्पेनको मायोर्का टापूमा बिदा मनाउन संसारभरिकै मान्छे पुग्ने गर्छन् । यही टापूमा पुरातत्वविद्हरूले ३२ सय वर्ष पुरानो तरबार फेला पारेका छन् । समुद्री किनारका लागि प्रसिद्ध मायोर्कामा कांस्य युगको तरबार भेटिएको हो ।
स्थानीय भाषामा तालायोत भनिने विशाल चट्टाननजिक तीन हजार वर्ष पुरानो तरबार भेटिएको थियो ।
पुरातत्वविद्को एउटा समूह संग्रहालय खोल्नका लागि ठाउँ हेर्न मायोर्का पुगेको थियो । दुई जना पुरातत्वविद्ले एउटा वस्तु जमिन छेडेर निक्लिएको देखे । होसियारीपूर्वक खोतलेर हेर्दा उनीहरूले तरबार फेला पारे ।
‘यो विशाल आश्चर्य हो,’ पुरातत्वविद् हाउमे देयाले भने, ‘यो क्षेत्रलाई उहिले नै उत्खनन गरिसकिएको थियो । यहाँ त्यस्तो महत्वपूर्ण केही चिज पाइएला भन्ने अपेक्षा नै थिएन । तर, तीन हजार वर्ष पुरानो तरबार, त्यो पनि सही सलामत, पाइयो ।’
तरबारको टुप्पो भाँच्चिएको छ । अन्यथा, यो राम्रै अवस्थामा छ । पुरातत्वविद्हरूले यो तरबार त्यतिबेला कुनै सम्भ्रान्त परिवारले ढुंगे स्मारकमा चढाएको हुन सक्ने बताए ।
हजारौँ वर्ष पुरानो तालायोती सभ्यतासँग सम्बन्ध राख्ने यस्ता तरबार अहिलेसम्म १० वटाजति भेट्टाइएका छन् । यो तरबारलाई संग्रहालयमा प्रदर्शनार्थ राखिने बताइएको छ ।
प्रतिक्रिया दिनुहोस !
