रक्षामन्त्री पोखरेल चीन पुगेर भने : एक देशवेष्ठित हुनुको दुर्भाग्य बदल्न चाहन्छौँ !

बेइजिङ : चीन भ्रमणमा रहेका उपप्रधान तथा रक्षामन्त्री ईश्वर पोखरेलले नेपालले अब भूपरिवेष्ठित देशको अधिकार, सुविधाको उपभोग गर्दै चीनसँगको कनेक्टिभिटीबाट नयाँ जीवनको रूपमा अघि बढ्न चाहेको बताएका छन् ।

'हामी भूगोलमा लामो समयदेखि नेपाल कसरी पढ्यौँ भने भूपरिवेष्ठित भनेर पढ्यौँ, साँचो अर्थमा हामी कुनै एउटा देशवेष्ठित हुन अभिशप्त बन्यौँ । हामी भूगोलमा पढ्थ्यौँ भूपरिवेष्ठित । यथार्थ जिन्दगीमुनी एउटा देशवेष्ठित भएर बाँच्न बाध्य भयौँ । यो दुर्भाग्य, नियति अब बदल्नुपर्छ भन्ने अठोट र संकल्पका साथ उठ्न खोज्दै छौँ,' पोखरेलले भने ।

चीनसितको कनेक्टिभिटी सिङ्गो देशको जिन्दगीको लागि नै महत्व राख्ने उनको भनाइ थियो । र यसलाई अगाडि बढाउन चाहेको उनले बताए । चीनसँगको सम्बन्धलाई आउटडेटेड होइन अपडेटेड गरेर देशको जिन्दगी बढाउन चाहेको पनि मन्त्री पोखरेलले बताएका थिए ।

उहानमा आयोजित अन्तर्राष्ट्रिय मिलिटरी गेम तथा नवौं बेइजिङ स्याङसान फोरममा सहभागी हुन बेइजिङ आएका उपप्रधानमन्त्री पोखरेलले बेइजिङस्थित नेपाली दूतावासले मङ्गलबार ५ गते बडा दसैं, तिहार, नेपाल सम्वत् नयाँ वर्षको आरम्भ र छठको अवसरमा आयोजना गरेको कार्यक्रममा सहभागी हुँदै उपस्थित नेपाली समुदायलाई शुभकामना पनि व्यक्त गरे ।

यससँगै उहानमा आयोजित मिलिटरी खेलमा नेपालले पहिलो पटक भाग लिएको हो । यस खेलमा १०९ देशको सहभागिता थियो । यसवाहेक उपप्रधानमन्त्रीको भ्रमण क्रममा आइतबार नेपाल र चीनबीच मानवीय तथा विपद् व्यवस्थापनका लागि सैन्य सामग्री उपलब्ध गराउने सम्झौतामा हस्ताक्षर भएको थियो ।