मुसिकोटमा डिग्रे मेला सम्पन्न : साढे एक लाख भक्तजनले गरे अवलोकन
कात्तिक २६, २०७६ मंगलबार १७:५:०
रुकुम : कर्णाली प्रदेशकै प्रशिद्ध धार्मिकस्थल रुकुम (पश्चिम)को मुसिकोट नगरपालिकामा रहेको डिग्रे शाईकुमारी मन्दिरमा साढे एक लाख भक्तजनले पूजापाठ तथा दर्शन गरेका छन् । गत शुक्रबारदेखि सुरु मेलाको मंगलबार अन्तिम दिनसम्म करिब एक लाख ५० हजार भक्तजनले पूजापाठ गरेको मेला व्यवस्थापन समितिका अध्यक्ष लालबहादुर केसीले जानकारी दिए।
मुसिकोट नगरपालिका ५ थर्पुमा रहेको डिग्रे मन्दिरमा हरेक वर्षको हरिबोधनीएकादशीदेखि पूर्णीमासम्म पूजापाठ तथा मेला सञ्चालन हुने गर्दछ । डिग्रे मन्दिरमा पूजापाठ गरेमा मनले चिताएको पुरा हुन्छ भन्ने धार्मिक विश्वासका साथ यहाँ भक्तजनले पूजा गर्ने गर्दछन् । डिग्रे मन्दिरमा पूजापाठ गर्नका लागि नेपालका विभिन्न ठाउँबाट भक्तजन रुकुम पुगेका थिए ।
नेपालका साथै विदेशीपर्यटकले समेत डिग्रे मन्दिरमा पूजापाठ गरेको अध्यक्ष केसीले जानकारी दिए। डिग्रे मन्दिरमा अवलोकनका लागि नेपालका साथै भारत, कोरिया, जापान, बेलायतलगायतका देशबाट भक्तजन यहाँआएको उनको भनाई छ ।
यस वर्ष डिग्रे मन्दिरमा नौ सय २९ वटा बोकाको बली चढाइएको समितिले जानकारी दिएको छ । उक्त बोकाको टाउको बिक्रीबाट मन्दिरमा तीन लाख २७ हजार रुपैयाँ संकलन भएको समितिका सचिव चुडामणी गौतमले बताए ।
धार्मिक तथा पर्यटकीय हिसाबले जिल्लाकै महत्वपूर्ण क्षेत्रका रुपमा समेत डिग्रे मन्दिरलाई लिने गरिएको यहाँका स्थानीय बरिष्ठ अधिवक्ता डा. नबराज गौतमको भनाई छ । मन्दिरमा पूजापाठ गरेपछि धन, पुत्र र अन्न प्राप्त हुने समेत विश्वास रहेको उनले बताए । 
प्रतिक्रिया दिनुहोस !
