दमौली : लामो समयदेखि बालबालिकामाथि आक्रमण गरिरहेको ठानिएको एक पोथी चितुवालाई भानु नगरपालिका १ जामुनेगैह्रामा पासोमा पारिएको छ ।
वन डिभिजन तनहुँले तयार पारेको पासोमा उक्त पोथी चितुवालाई नियन्त्रणमा राखिएको हो । फलामका आधुनिक पासोमा चितुवा नपरेपछि स्थानीय हरिभक्त ढकालको सहयोगमा विभिन्न वनमा पासो राखिएको थियो । त्यही मध्येको भीमसेन थुम्की सामुदायिक वनमा राति चितुवा पारेको अवस्थामा बिहान भेटिएको बरालले बताए ।
विज्ञहरुका अनुसार हालसम्म जति पनि बालबालिकामाथि आक्रमण भएका छन््, ती सबैमा पोथी चितुवाको संलग्नता पाइएको छ । ‘नियन्त्रणमा परेको पोथी चितुवा नै भएको खुलेको छ’ डिभिजन प्रमुख केदार बरालले भने, ‘तर यो बाहेक अरु पनि पोथी चितुवा जंगलमा रहेको आशंका छ ।’
केही सातायता चितुवा नियन्त्रणका लागि वन्यजन्तु विभागबाट खटिएका विज्ञ नरेश सुवेदीले वनमा अझै पनि सातवटा जति चितुवा रहेको अनुमान गरेका थिए । ‘यहाँ एकभन्दा बढी पोथी चितुवा भएकैले आक्रमणका घटना बढेका हुन्, उनले भने । हाल नियन्त्रणमा लिइएको चितुवा चितवन राष्ट्रिय निकुञ्जमा पठाइएको छ ।
नियन्त्रणका लागि क्यामेरासहित निगरानी
६ बालबालिकाको ज्यान गइसकेपछि अवस्था विकराल रहेको ठहर गर्दै प्रदेश सरकारले स्थानीय तह र वन डिभिजनमार्फत परिचालनका लागि ३० लाख रुपैयाँ बजेट विनियोजन गरेको थियो ।सोही क्रममा विभागबाट विज्ञसहितको टोली अहिले भानुमा छ । टोलीले अझै पनि चितुवा नियन्त्रणका लागि गस्ती र निगरानी गरिरहेको छ ।
भानुका १ देखि ४ सम्मका वडामा टोलीले काम गरिरहेको छ । ‘चितुवाको नियन्त्रणका लागि ठाउँ ठाउँमा क्यामेरासहित निगरानी भइरहेको छ । सोही आधारमा गस्ती र पासो थप्ने काम भइरहेको छ,’ उनले भने । यस्ता क्यामेरा तीन प्रमुख वनमा राखेको बताइएको छ ।
प्रतिक्रिया दिनुहोस !
