जनकपुरधाम : प्रदेश २ का मुख्यमन्त्री मो. लालबाबु राउत गद्दीले धनुषाको क्षिरेश्वरनाथ नगरपालिका ५ महेन्द्रनगर शुक्रबार मध्यरातमा भएको बम बिस्फोट घटनाका पीडित परिवारलाई भेटेका छन् । आइतबार बिहानै मुख्यमन्त्रीसहितको टोली घटनास्थल पुगी बम विस्फोट घटनाको बारेमा बुझि पीडित परिवारलाई सान्तवना दिएका छन् ।
पीडित परिवारलाई भेट्न पुगेका मुख्यमन्त्री राउतले घाइतेको सम्पूर्ण उपचार खर्च प्रदेश सरकारले ब्यहोर्ने र मृतक परिवार राहत समेत उपलब्ध गराउने प्रतिबद्धता जनाए । मृतक परिवारलाई उपलब्ध गराइने रकमबारे आउँदो मन्त्रीपरिषद्को बैठकबाट निर्णय गरिने समेत बताए ।
मुख्यमन्त्री राउतसँगै प्रदेशसभा सभामुख सरोज कुमार यादव, समाजवादीका प्रमुख सचेतक शैलेन्द्र यादव, प्रदेशसभा सदस्य सिघासन सा कलबार, मुख्यन्यायधिबक्ता दिपेन्द्र झा सहितको सहभागिता रहेको थियो ।
शुक्रबार मध्यरातमा बम बिस्फोटमा परी इलाका प्रहरी कार्यालय महेन्द्रगरका प्रहरी निरीक्षक अमिर दाहालसहित तीन जनाको मृत्यु भएको थियो । मृतक दाहालसहित राजेश साह र आनन्द साहको शनिबार साँझ अन्तेष्टि गरिसकेको छ ।
घटनाको छानविनका क्रममा पाँचजनालाई पक्राउ गरेको जिल्ला प्रहरी कार्यालय धनुषाका प्रहरी नायव उपरीक्षक रामेश्वर कार्कीले जनाए । उनले भने, 'पक्राउ गरेर अनुसन्धान गर्दैछौं, अहिले नै केही भन्न सकिने अवस्था छैन, तर छिट्टै यसको रिजल्ट आउँछ ।'
प्रदेश २ का मुख्यमन्त्री राउत र सभामुखसहितको टोली घटनास्थलमा। तस्बिर : अन्नपूर्ण
प्रतिक्रिया दिनुहोस !
