डोल्पामा विपत व्यवस्थापनको आकस्मिक बैठक, औषधि र विशेषज्ञ ल्याउने तयारी
फागुन २०, २०७६ मंगलबार १७:१३:०
डोल्पा : जिल्ला विपत व्यवस्थापनको आकस्मिक बैठक बसेको छ। डोल्पाको त्रिपुरासुन्दरी नगरपालिका १ को करेली काँडागाँउमा अज्ञात रोगका कारण गाउँ नै थला परेपछि विपत व्यवस्थापनको आकस्मिक बैठक बसेको प्रमुख जिल्ला अधिकारी सुरेश सुनारले जानकारी दिए ।
अज्ञात रोगका कारण करेलिकाँडा गाउँमा ३५ जना बिरामी रहेको र मौसमी रुघाखोकीसँग मिल्ने लक्षण भएकाले आत्तिन नहुन जिल्ला अस्पताल डोल्पाका डाक्टर मेलिना हमालले आग्रह गरेकी छन् ।
हाल उक्त गाउँमा सोमबारदेखि स्वास्थ्यकर्मीले चेकजाँच गरिरहेका छन्।बिरामीको खकार र सिगानको नमुना संकलन गर्न कर्णाली प्रदेश सुर्खेतबाट टोली आउने डाक्टर हमालले जानकारी दिइन् ।
नमुना संकलन गरी हेलिकप्टरमार्फत काठमाडौं लैजाने तयारी भएको प्रजिअ सुनारले बताए । सबै प्रक्रिया गर्दै समय ढिला भएकोले मौसम प्रतिकुलका कारण मंगलबा हेलिकोप्टर उडन नसकेकाले भोली समयमा हेलीकोप्टरमार्फत विशेषज्ञको टोली केरेलीकाँडमा पुगेर एक टोली गाउँमै बस्ने उनले बताए ।
कर्णाली प्रदेश सामाजिक विकास मन्त्रालयको आर्थिक सहयोगमा हेलिकोप्टरमार्फत बिरामीको नमूना संकलन गरेर काडमाडौं लैजान लागिएको प्रजिअ सुरेश सुनारले जानकारी दिए ।
विपत व्यवस्थापनको बैठकले सबै क्षेत्रबाट सबैले सचेत हुन आग्रह गर्दै स्वास्थ्यमा आउने कुनैपनि विपतमा सहजता मिलोस भन्ने हिसाबले सहायक प्रमुख जिल्ला अधिकारीको संयोजकत्वमा पूर्व तयारी योजना समिति गठन गरेको छ ।
रोगले थलिएको गाउँमा रहेको लेखनाथ आधारभूत विद्यालयले रोगको पहिचान र बिरामी निको नहुन्जेलसम्म विद्यालय समेत बन्द गर्ने सूचना प्रकाशित गरेको छ।
प्रतिक्रिया दिनुहोस !
