काठमाडौं : त्रि.वि. शिक्षण अस्पतालमा अहिले मिडिया र सर्वसाधारणलगायतको भिड लागेको छ । प्रधानमन्त्री केपी शर्मा ओलीको स्वास्थ्य लाभको कामना गर्न बुधबार बिहानदेखि अस्पताल परिसरमा राजनीतिक दलका नेतादेखि नेकपाका कार्यकर्ता, विभिन्न संघसंगठनका व्यक्ति र सर्वसाधारणको हुल जम्मा भएको हो ।
कोही हातमा 'गेट वेल सुन'को पाम्मप्लेट बोक्दै त कोही केपी ओलीको तस्बिर र पेन्टिङ लिएर अस्पतालमा जम्मा भएका छन् । यसै क्रममा भेटिइन् धादिङकी सन्तोषी पौडेल ।
दिदीको उपचार गराउन उनी त्रि.वि. शिक्षण अस्पताल आएकी हुन् । केहिदिन अगाडि काठमाडौं आएकी सन्तोषीको हातमा प्रधानमन्त्रीको फोटो छ । उनी देशको प्रधानमन्त्रीको सिघ्र स्वाथ्य लाभको कामना गर्दै छिन् । अहिलेको अवस्थामा प्रधानमन्त्री स्वस्थ रहनु आवश्यक छ’, उनी भन्छिन्, ‘देशलाई चाहिने नेता हुन् उनी ।’ प्रधानमन्त्रीको सल्यक्रियामा करिब ५ घण्टा लाग्ने थाहा पाएपछि उनले सल्यक्रिया सफल भएको समाचार सुन्न आतुर भएको बताइन् ।
महाराजगन्ज नर्सिङ क्याम्पसका विद्यार्थी पनि प्रधानमन्त्रीको स्वास्थ्य लाभको कामनाको लागि अस्पताल पुगेका छन् । करिब २० जनाको समूहमा रहेका विद्यार्थीहरू सल्यक्रिया नसकिएसम्म अस्पतालमै रहने भएका छन् । विद्यार्थी ऋचा घिमिरे भन्छिन्, ‘बिहान ९ बजे नै हामी अस्पताल आएका हौं । बिहान बेलुकाको ड्युटी मिलाएर आएका हौं । सल्यक्रिया नसकुनजेल यहीँ बस्नेछौं ।’
कलंकीका नारायणप्रसाद बस्याल पनि प्रधानमन्त्रीको स्वास्थ्य लाभ चाहन्छन् । त्रि.वि. शिक्षण अस्पतालमा केपी ओलीको उपचार भइरहेको थाहा पाएपछि उनी केही साथीसहित बिहानै अस्पताल पुगेका रहेछन् । भन्छन्, ‘पशुपतिनाथले प्रधानमन्त्रीलाई हप्ता दस दिनमै हिँड्न सक्ने बनाऊन् र देशको सेवामा फेरि लाग्ने प्रेरणा दिऊन् ।’
प्रतिक्रिया दिनुहोस !
