सहयोग बाँड्दै सामुदायिक वन
गुलरिय : कोरोना भाईरस (कोभिड-१९) को संक्रमणले समाज थलिएका बेला बर्दियाका सामुदायिक वन उपभोक्तालाई सहयोगसँगै रोगबाट बच्ने स्वास्थ्य सामग्री वितरणमा जुटेका छन् । उपभोक्ता समितिको विनियम अन्र्तगत गरीब, विपन्न कोषमार्फत उपभोक्ताका जीवन रक्षाका निम्ति राहत तथा सहयोगमा उत्रिएका हुन्।
बर्दियाको मधुवन नगरपालिका वार्ड नम्बर ५ मा अवस्थित कालिका सामुदायिक वन उपभोक्ता समितिले उपभोक्तालाई कोरोना महामारीबाट राहत दिलाउन ५ लाख रुपैयाँ घोषणा गरेको छ ।
आफ्ना उपभोक्तालाई विषम परिस्थितिका बेला सहयोग पुर्याउन समितिले रकम विनियोजन गरेको सामुदायिक वन उपभोक्ता महासंघका केन्द्रिय सदस्य मोहम्मद कर खाँले बताए । विनियोजित बजेट मार्फत खाद्यान्न, मास्क, सेनिटाइजरलगायतका सुरक्षित मेडिकल सामग्री उपलब्ध गराउने समितिको योजना छ ।
ठाकुरबाबामा अवस्थित खोदाउ सामुदायिक वनले समितिअन्र्तगतका उपभोक्तालाई साबुन, मास्क, पानीलगायतका अत्यावश्यक सामग्री वितरण गरेको छ । उनले भने सामुदायिक वनको गरीब, विपन्न उपभोक्तालाई ३५ प्रतिशत रकम अनिवार्य बाँड्नु पर्ने हुन्छ । सोही अन्र्तगत उपभोक्ता समितिले सहयोग गरेका हुन् । बाँसगढी नगरपालिकामा रहेको बनस्पती देवी सामुदायिक वन उपभोक्ता समितिले पनि उपभोक्तालाई कोरोना भाइरसको जोखिम नियन्त्रण गर्न स्वास्थ्य सामग्री बाँडेको छ ।
बर्दियामा ३ सय वटा सामुदायिक वन उपभोक्ता समिति छन् । खाँले थपे बर्दियाका ६५ हजार घरधुरीका ३ लाख उपभोक्ता सामुदायिक वनमा सदस्य छन् । सबै सामुदायिक वनले विपन्न कोषको रकम राहत कार्यमा खर्च गर्न हामीले सर्कुलर गरीसकेका छौं ।
देशैभर महामारीको त्रासका रुपमा रहेको कोरोना लकडाउनका कारण विपन्न उपभोक्ताहरु कामकाज गर्न नपाउँदा भोकभोकै बस्नुपर्ने अवस्था छ । बर्दिया जिल्ला भरीका सामुदायिक वनमा ६५ वटा सामुदायिक भवनहरु रहेकाले सरकारलाई आवश्यक परे क्वारेन्टाइन स्थल निर्माणका लागि दिइने उनले बताए । वनक्षेत्रमा रहेका हाम्रा सामुदायिक भवनहरु सुरक्षित र वातानुकुलित छन् । आवश्यकता अनुसार क्वारेन्टाइन निर्माण गर्न पनि सकिन्छ । जुनसुकै बेला पनि हामीले भवन उपलब्ध गराउन सक्छौं । लकडाउनका बेला अत्यावश्यक काम बाहेक कोही पनि उपभोक्ता घर बाहिर ननिस्कन उनले आग्रह गरेका छन्।