डोटीका क्वारेन्टाइनमा रहेकाको स्वाब संकलन सुरु
डोटी : डोटीका विभिन्न क्वारेन्टाइनमा बसेका व्यक्तिको थ्रोट स्वाब संकलन गर्ने कार्य बुधबारबाट सुरू भएको छ । जिल्लामा रहेका सबै क्वारेन्टाइनमा रहेका ३०५ जनाको स्वाब संकलन हुने प्रमुख जिल्ला अधिकारी टेक नारायण पौडेलले बताए ।
देशमा लकडाउन सुरू भएपछि भारतबाट घर फर्केका व्यक्तिलाई क्वारेन्टाइनमा राखिएको थियो । जिल्लाका ६ स्थानमा गएर स्वाब संकलनको कार्य भइरहेको छ । जिल्ला अस्पताल, प्रदेश प्रहरी अस्पताल तथा अन्य अस्पतालका स्वास्थ्यकर्मीको टोलीले स्वाब संकलन गरिरहेका छन्। कीट तथा अन्य स्वास्थ्य सामग्री भने काठमाडौंबाट हेलिकोप्टरमार्फत ल्याइएको छ ।
बुधबार र बिहीबार स्वाब संकलन गरी काठमाडौं पठाइने र पठाएको दुई, तीन दिनभित्रै रिपोर्ट आइसक्ने जिल्ला स्वास्थ्य कार्यालयका प्रमुख रमेश मलासीले बताए । दिपायल सिलगढी नगरपालिकाको राजपुरमा ४८ जना, शिखर नगरपालिकाको धुर्काटमा ४६ जना, शिखर नगरपालिकाकै बानेडुग्रीसैनमा ३० जनाको स्वाब संकलन हुने बताइएको छ ।
त्यसैगरी आदर्श गाउँपालिकाको मौवादहमा ७३ जना, बोगटान फुड्सिल गाउँपालिकाको खत्याडीमा ६७ जना र बडिकेदार गाउँपालिकाको बिपीनगरमा ४१ जनाकोपनि स्वाब संकलन हुनेछ । क्वारेन्टाइनमा बस्नेको संख्या चार सय २८ रहेपनि अहिले ३०५ जनाको मात्र स्वाब परीक्षण हुने भएको हो । कीट केही बढीनै भएका कारण स्वाब संकलन हुनेको संख्या बढ्न सक्ने बताइएको छ ।
बाजुराका बिरामीको रिपोर्ट 'नेगेटिभ'
केही दिनदेखि जिल्ला अस्पतालमा रहेका आइसोलेसनमा रहेका दोस्रो व्यक्तिको थ्रोट स्वाबको रिपोर्ट पनि नेगटिभ आएको छ । कोरोनाको आशंकामा जिल्ला अस्पताल बाजुराले २३ गते एक जनालाई आइसोलेसन कक्षमा भर्ना गरेको थियो ।
२० वर्षीय ती युवकलाई जिल्ला अस्पतालको आइसोलेसन कक्षमा भर्ना गरिएको ३ दिन पछि रिर्पोट निगेटिभ देखिएको जिल्ला अस्पतालका सूचना अधिकारी चुडामणी पन्तले बताए । आइसोलेसनमा भर्ना गरिएका युवकको अवस्था सामान्य रहेको र बुधबार उनलाई वार्डमा भर्ना गरेर भोली मात्र डिस्चार्ज गरिने जिल्ला अस्पताल बाजुराका प्रमुख डाक्टर रुपचन्द्र बिश्वकर्माले बताए ।